Milli Müdafiə Universitetində “Azərbaycan dili milli kimliyimizdir” mövzusunda dəyirmi masa təşkil olunub.
Tədbiri giriş sözü ilə açan Milli Müdafiə Universitetinin rektoru, general-mayor Gündüz Əbdülov Azərbaycan dilinin tarixi, milli kimliyin formalaşmasındakı rolu və Zəfərdən sonra beynəlxalq arenada möhkəmlənən mövqeyi barədə fikirlərini bölüşüb. O, Prezident İlham Əliyevin Azərbaycan dilinin qorunması və saflığının təmin edilməsi ilə bağlı çıxışlarını xatırladaraq, mövzunun həm elmi, həm də ictimai baxımdan böyük əhəmiyyət daşıdığını vurğulayıb. Rektor, Vətən müharibəsindən sonra ölkəmizin beynəlxalq nüfuzunun artmasının Azərbaycan dilinin mövqeyinə də müsbət təsir göstərdiyini qeyd edib, hərbi sahədə milli terminologiyanın düzgün və vahid şəkildə istifadəsinin vacibliyinə diqqət çəkib.
Tədbirdə çıxış edən Azərbaycan Milli Elmlər Akademiyasının həqiqi üzvü, filologiya elmləri doktoru, professor Nizami Cəfərov dil siyasəti, ədəbi dil normaları, terminoloji təhlükəsizlik, elmi və bədii mühitdə dil mədəniyyətinin qorunması məsələlərindən bəhs edib. O, Azərbaycan Ordusunda ana dilinin qorunması və hərbi dilin sistemli şəkildə inkişaf etdirilməsinin strateji əhəmiyyət daşıdığını vurğulayıb.
Daha sonra AMEA-nın İmadəddin Nəsimi adına Dilçilik İnstitutunun direktoru Nadir Məmmədov Prezident İlham Əliyevin Azərbaycan dili ilə bağlı həyata keçirdiyi siyasət kontekstində institut tərəfindən görülən işlər barədə iştirakçılara ətraflı məlumat verib.
Azərbaycan Dövlət Pedaqoji Universitetinin prorektoru, filologiya elmləri doktoru, professor Mahirə Hüseynova isə “Azərbaycan dili türk dilləri ailəsində” mövzusunda çıxış edərək, Azərbaycan dilinin türk dilləri qrupuna mənsubiyyəti, eləcə də bu sahədə aparılan müasir elmi tədqiqatlar haqqında geniş məlumat təqdim edib.
Tədbir çərçivəsində Ulu Öndər Heydər Əliyevin Azərbaycan dili ilə bağlı çıxışlarını və dilimizin tarixi inkişafına dair fikirlərini əks etdirən videoçarxlar nümayiş olunub.
Sonda bu kimi elmi-mədəni tədbirlərin gələcəkdə mütəmadi təşkili, əməkdaşlığın genişləndirilməsi, eləcə də hərbi Azərbaycan dilinin, Azərbaycan Ordusunda istifadə olunan terminologiyanın, əmr və komanda sisteminin daha da təkmilləşdirilməsi istiqamətində qarşılıqlı razılıq əldə olunub.
Həsən
Paraqraf.com
