Almatıda Xalq rəssamı Lətif Kərimovun 120 illiyi münasibətilə sərgi açılacaq

Qazaxıstanın Almatı şəhərində görkəmli xalçaçı-rəssam, Xalq rəssamı Lətif Kərimovun 120 illiyinə həsr olunmuş “Zamanın nəfəsi xalq sənətində” adlı sərgi açılacaq.

Bu barədə Paraqraf.com-a Azərbaycan Milli Xalça Muzeyindən məlumat verilib.

Bildirilib k, Azərbaycan Milli Xalça Muzeyinin kolleksiyası əsasında hazırlanmış ekspozisiyada XIX–XX əsrlərə aid sənət nümunələri təqdim olunacaq.

Sərginin əsas hissəsini Azərbaycanın zəngin milli irsinin regional xüsusiyyətlərini və bədii müxtəlifliyini əks etdirən Quba, Bakı, Şirvan, Qarabağ, Qazax və Gəncə xalçaları təşkil edəcək. Ekspozisiyada “Pirəbədil”, “Qabıstan”, “Suraxanı”, “Faxralı”, “Salahlı”, “Xanlıq” və “Mir” xovlu xalçaları, həmçinin kilim, şəddə, vərni və zili kimi xovsuz xalçalar təşkil edəcək.

Ekspozisiyanın xüsusi bölməsində Azərbaycan Milli Xalça Muzeyinin banisi Lətif Kərimovun müəllifi olduğu eskizlər, eləcə də “İkinci bahar” və “Xətai” xalçaları təqdim ediləcək.

Xalça sənətinin müxtəlif istiqamətlərini nümayiş etdirən sərgidə məfrəş, xurcun, çul kimi xalça məmulatları, eyni zamanda bədii tikmə, zərgərlik və bədii metal nümunələri, milli qadın geyimləri də yer alacaq.

“Zamanın nəfəsi xalq sənətində” sərgisi Azərbaycanın zəngin mədəni irsi, xalq sənətinin çoxəsrlik ənənələri və tarixi inkişafı haqqında ziyarətçilərdə dolğun təsəvvür formalaşdıracaq.

Oktyabrın 4-dək davam edəcək sərgi Azərbaycan və Qazaxıstan mədəniyyət nazirlikləri, Türk Mədəniyyəti və İrsi Fondu, Azərbaycan Milli Xalça Muzeyi və Qazaxıstan Milli Mərkəzi Muzeyinin təşkilatçılığı ilə keçiriləcək.

 

Paraqraf.com