Azərbaycan Milli Elmlər Akademiyası Fəlsəfə və Sosiologiya İnstitutunun təşkilatçılığı ilə yazıçı-tədqiqatçı Sadıq Qarayevin yaradıcılığına həsr olunmuş “Azərbaycançılıq məfkurəsi və Zəfərin vəhdəti” mövzusunda tədbir keçirilib.
Tədbirdə çıxış edən natiqlərdən biri milli ideologiyanın dövlət quruculuğundakı əvəzsiz rolundan danışıb. Çıxışda Azərbaycançılıq məfkurəsinin xalqı vahid amal ətrafında birləşdirən əsas mənəvi dayaqlardan biri olduğu vurğulanıb, bu istiqamətdə dövlət tərəfindən həyata keçirilən məqsədyönlü siyasətin əhəmiyyətinə toxunulub. Qeyd edilib ki, Cənab Prezident İlham Əliyevin rəhbərliyi ilə milli ideologiyanın möhkəmləndirilməsi dövlət siyasətinin prioritet istiqamətlərindəndir.
Xüsusilə, Cənab Prezidentin ana dili ilə bağlı çıxışlarında səsləndirdiyi fikirlərin milli kimliyimizin qorunması baxımından mühüm istiqamət müəyyən etdiyi diqqətə çatdırılıb. Ana dilinin milli ideologiyanın ruhunu, milli yaddaşı və kimliyi formalaşdıran əsas sütunlardan biri olduğu bildirilib.
Eyni zamanda, ideoloji fəaliyyətin elmi əsaslarla aparılmasının vacibliyi vurğulanıb, ədəbiyyatın və kitabların bu sahədə maarifləndirici roluna xüsusi diqqət yetirilib. Bildirilib ki, hər bir elmi tədqiqat və ədəbi əsər milli ideya və dövlətçilik dəyərlərinin möhkəmlənməsinə xidmət etməlidir.
Tədbir iştirakçıları bu kimi elmi-mədəni toplantıların milli düşüncənin inkişafına, Azərbaycançılıq məfkurəsinin geniş miqyasda təbliğinə və gənc nəsildə ideoloji oyanışın güclənməsinə mühüm töhfə verdiyini qeyd ediblər.
Həsən
Paraqraf.com
