Fevralın 9-u tanınmış riyaziyyatçı-alim, fəlsəfə elmləri doktoru, professor Maarif Süleyman oğlu Əkbərovun doğum günüdür.
Maarif Əkbərov 9 fevral 1930-cu ildə Ermənistan Respublikasının Vedi rayonunda anadan olub. O, 1953-cü ildə Həsən bəy Zərdabi adına Kirovabad Pedaqoji İnstitutunun fizika-riyaziyyat fakültəsini fərqlənmə diplomu ilə bitirib və əmək fəaliyyətinə həmin institutun cəbr-həndəsə kafedrasında başlayıb. 1953–1959-cu illərdə elementar riyaziyyat kafedrasının müdiri vəzifəsində çalışıb.
1959-cu ildə Moskva Dövlət Universitetinin riyaziyyatın fəlsəfə problemləri ixtisası üzrə əyani aspiranturasına daxil olan alim, 1962-ci ildə namizədlik dissertasiyasını müdafiə edib. 1963-cü ildən etibarən ADU-nun (indiki BDU) mexanika-riyaziyyat fakültəsində fəaliyyət göstərib, həndəsə-cəbr, cəbr və topologiya, həndəsə kafedralarında çalışıb. O, 1980–1992-ci illərdə cəbr və topologiya kafedrasına rəhbərlik edib.
1970–1972-ci illərdə Moskva Dövlət Universitetində doktorantura təhsili alan Maarif Əkbərov “Riyaziyyatın bəzi fəlsəfi problemləri” mövzusunda doktorluq dissertasiyasını müdafiə edib. Alim 3 monoqrafiyanın, 18 kitabın, 3 dərs vəsaitinin və 100-dən artıq elmi, elmi-metodik və publisist məqalənin müəllifidir.
Maarif Əkbərov 2006-cı ildə Bakıda vəfat edib. Onun elmi və pedaqoji fəaliyyəti Azərbaycan elminin inkişafında mühüm yer tutur.
Misir Mərdənov
Paraqraf.com
