Liviya Nümayəndələr Palatası Milli Razılıq Hökuməti ilə Türkiyə arasında Aralıq dənizində dəniz yurisdiksiyası zonalarının müəyyənləşdirilməsinə dair imzalanmış Anlaşma Memorandumunu təsdiqləyib.
“Paraqraf.com” Türkiyə mediasına istinadən xəbər verir ki, dəniz yurisdiksiyası zonaları sahilyanı dövlətlərin dənizlərdə suveren hüquqlara malik olduğu və müəyyən fəaliyyətləri tənzimləyə bildiyi əraziləri əhatə edir.
Bu zonalarda balıqçılıq, təbii ehtiyatların axtarışı və hasilatı, enerji istehsalı, eləcə də dəniz mühitinin qorunması ilə bağlı hüquq və səlahiyyətlər beynəlxalq hüquq normaları çərçivəsində müəyyənləşdirilir.
Dəniz yurisdiksiyası zonalarına ərazi suları, kontinental şelf və müstəsna iqtisadi zona kimi fərqli hüquqi statusa malik ərazilər daxildir. Bu zonaların hər birində sahilyanı dövlətin səlahiyyətləri fərqlənir.
Ərazi sularında dövlətin suverenliyi əsas götürüldüyü halda, müstəsna iqtisadi zonada dəniz dibindəki və su qatındakı müəyyən təbii ehtiyatların kəşfiyyatı, istismarı və idarə olunması ilə bağlı suveren hüquqlar tətbiq edilir.
Dəniz yurisdiksiyası zonalarının sərhədləri sahil xətlərinin coğrafi mövqeyi və beynəlxalq hüquq normaları nəzərə alınmaqla müəyyənləşdirilir.
Sahilləri bir-birinə qarşı yerləşən və ya bitişik olan ölkələr arasında sərhədlərin üst-üstə düşməsi hallarında dəniz yurisdiksiyası zonalarının delimitasiyası ikitərəfli sazişlər və ya beynəlxalq hüquqa uyğun digər üsullarla həyata keçirilir. Bu zonalar dəniz ticarəti, enerji ehtiyatları, balıqçılıq və dövlətlərin dənizlərdəki strateji maraqları baxımından mühüm əhəmiyyət daşıyır
