On il əvvəl – 2016-cı ilin aprelində Azərbaycanın ön xətt mövqeləri və yaşayış məntəqələri Ermənistan silahlı qüvvələri tərəfindən intensiv artilleriya atəşinə məruz qaldı. Ordumuzun bölmələri əks-həmlə ilə bu təxribatların qarşısını qətiyyətlə aldı. Tarixə Aprel döyüşləri kimi düşən bu hərbi toqquşmalar bir neçə gün davam etdi.
Azərbaycan Ordusu bir sıra strateji yüksəklikləri və mövqeləri nəzarətə götürərək cəbhə xəttində mühüm taktiki üstünlük əldə etdi. Döyüşlər Azərbaycan Ordusunun qələbəsi ilə nəticələndi. Tərtər rayonunun Talış kəndi ətrafındakı yüksəkliklər, Cəbrayıl rayonunun Lələtəpə yüksəkliyi, Cocuq Mərcanlı, Goranboy rayonunun Gülüstan kəndi və Tərtər rayonunun Madagiz istiqamətində bəzi mövqelər düşməndən azad olundu.
Ümumilikdə, işğal dövründə Ermənistan silahlı qüvvələri mütəmadi təxribatlar törədərək regionda vəziyyəti gərginləşdirirdi. Lakin bu təxribatların qarşısı hər zaman vaxtında alınır, düşmən layiqli cavabını alırdı. Nəticəsiz danışıqlar və ATƏT-in Minsk Qrupunun həmsədrlərinin “status-kvo”nu qoruyub saxlamaq cəhdləri təcavüzkar ölkəni yeni təxribatlara sövq edirdi. Bununla belə, rəsmi Bakının qətiyyəti və ordumuzun gücü bu vəziyyətin uzun müddət davam etməyəcəyini açıq şəkildə göstərirdi.
Aprel döyüşləri sübut etdi ki, vaxt Azərbaycanın xeyrinə işləyir. Ermənistan ordusu haqqında illərdir formalaşdırılan miflər darmadağın edildi. Ermənistanda hərbi-siyasi vəziyyət dəyişdi, ölkədaxili siyasi böhran dərinləşdi və bu proseslər sonrakı hadisələrə ciddi təsir göstərdi. Cəbhədəki itkilər və strateji mövqelərin itirilməsi hakimiyyətə qarşı narazılığı artırdı, orduda korrupsiya və zəif idarəetmə problemləri daha açıq müzakirə olunmağa başlandı. Nəticədə, ictimai təzyiq gücləndi və ölkədə siyasi dəyişikliklər baş verdi.
Döyüşlərin əsas strateji nəticələrindən biri Azərbaycan Ordusunun yüksək döyüş qabiliyyətini nümayiş etdirməsi oldu. Uzun illər ərzində həyata keçirilən hərbi islahatların real nəticəsi məhz bu qısamüddətli, lakin intensiv döyüşlərdə özünü göstərdi. Bu, həm Ermənistana, həm də onun havadarlarına verilmiş açıq mesaj idi.
Aprel döyüşləri bir daha göstərdi ki, mövcud vəziyyət dəyişməz deyil və hərbi-siyasi balans istənilən an dəyişə bilər. Əldə edilən strateji mövqelər Azərbaycana mühüm üstünlüklər qazandırdı, müşahidə və müdafiə imkanlarını genişləndirdi, gələcək əməliyyatlar üçün əlverişli şərait yaratdı.
Eyni zamanda, bu döyüşlər zamanı ordunun bütün strukturlarının real döyüş şəraitində sınaqdan keçirilməsi İkinci Qarabağ müharibəsinə hazırlıq baxımından mühüm əhəmiyyət kəsb etdi. Beləliklə, Aprel döyüşləri 4 il sonra qazanılan 44 günlük Vətən müharibəsindəki tarixi Zəfərin başlanğıcı kimi mühüm strateji rol oynadı və gələcək proseslərin istiqamətini müəyyənləşdirdi.
Azərbaycan 30 illik işğala son qoyaraq 2020-ci ilin 44 günlük Vətən müharibəsində ərazi bütövlüyünü bərpa etdi, 2023-cü ilin sentyabrında keçirilən 23 saatlıq uğurlu antiterror əməliyyatları nəticəsində isə suverenliyini tam təmin etdi.
Nigar Məmmədova
Milli Məclisin Deputatı
