Müəllimlərin İşə Qəbulu (MİQ) imtahanlarının keçiriləcəyi tarixlərin elan olunmasından sonra minlərlə işsiz namizəd üçün əsas suallardan biri də məhz budur. Müəllim olmaq istəyən, xüsusilə rayon və kənd yerlərində yaşayan on minlərlə gənc üçün 60 AZN qeydiyyat haqqı kifayət qədər ciddi məbləğ sayılır.
Maraqlıdır, belə olan halda Elm və Təhsil Nazirliyi və MÜTDA bu problemi necə həll etməlidir ki, həm resurslar səmərəli istifadə olunsun, həm də müəllim olmaq istəyən gənclərin qarşısında maddi maneə qalmasın?
Mövzu ilə bağlı təhsil eksperti Məzahir Məmmədli “Paraqraf.com”a bildirib ki, müəllimlərin işə qəbulu ilə bağlı bu təşəbbüs Elm və Təhsil Nazirliyi tərəfindən Milli Məclis gündəliyinə çıxarılanda sosial şəbəkələrdə də geniş müzakirələr gedirdi:
“İmtahan verəcək şəxslərin əksəriyyəti hələ müəllim deyillər. Onların işsiz olduqları halda, 60 manat onlar üçün böyük məbləğdir. Statistikalar isə onu göstərdi ki, imtahanda iştirak edəcək şəxslərin hamısı ilk dəfə müraciət edən şəxslər deyillər. Milli Məclisdə müzakirə olunaraq təsdiqlənmiş 60 manatlıq ödəniş ilk dəfə imtahan verən şəxslərə şamil edilməyəcək. Bu qərar sui-istifadə hallarının qarşısını almaq məqsədi daşıyır.
Əlavə xərclər ortaya çıxdığı üçün Elm və Təhsil Nazirliyi belə neqativ halların qarşısını almaq üçün müraciət edib imtahanda iştirak etməyənləri çəkindirmək məqsədilə bu addımı atıb. Hər il müraciət edən şəxslərin arasında 5-10 min insan imtahana gəlmir. Bu isə əlavə xərclər yaradır”.
Kəmalə Vəliyeva
Paraqraf.com
