Bu gün “Azərbaycan bayrağı” ordenli, ehtiyatda olan polkovnik Elmar Hüseynovun əlamətdar doğum günüdür.
30 aprel 1958-ci ildə Daşkəsəndə sadə, zəhmətkeş ailədə dünyaya göz açan Elmar Hüseynov ömrünü Vətənə xidmətə həsr etmiş şərəfli bir ömür yolunun sahibidir. Hələ məktəb illərindən hərb sənətinə olan böyük sevgisi onu illər sonra Azərbaycanın igid zabitlərindən birinə çevirdi.
O, xidmət etdiyi bütün dövrlərdə – istər Daxili Qoşunlarda, istər Xüsusi Təyinatlı Milis Dəstəsində, istərsə də Milli Qvardiya və Ədliyyə Nazirliyində – daim yüksək peşəkarlıq, cəsarət və vətənpərvərlik nümayiş etdirib. Qarabağın ən ağır döyüş bölgələrində göstərdiyi igidlik, çətin anlarda verdiyi düzgün qərarlar və döyüş yoldaşlarını qoruma bacarığı onun adını şərəf tariximizə yazıb.
Xocalı aeroportunun nəzarətə götürülməsi əməliyyatından tutmuş, Goranboy, Şuşa, Laçın və digər bölgələrdə apardığı uğurlu döyüşlərə qədər hər addımında Vətən sevgisi dayanıb. O, yalnız komandir deyil, həm də əsl lider, əsl vətən oğludur.
Bu gün də o, veteran hərəkatında fəal iştirak edərək gənc nəslin vətənpərvərlik ruhunda yetişməsinə töhfə verir, şəhid ailələri və qazilərlə daim bir yerdə olur, onların qayğıları ilə maraqlanır. 44 günlük Vətən müharibəsi dövründə göstərdiyi dəstək və təşkilatçılığı isə onun Vətənə bağlılığının davam edən sübutudur.
“Paraqraf.com” xəbər portalı adından sizi doğum gününüz münasibətilə ürəkdən təbrik edirik! Sizə möhkəm can sağlığı, uzun ömür, ailə səadəti və gələcək fəaliyyətinizdə yeni uğurlar arzulayırıq. Sizin kimi ömrünü Vətənə həsr edən insanlar xalqımız üçün böyük qürur mənbəyidir.
Türkan Səfərova
Paraqraf.com
