“Barselona” “Real”a qalib gələrək İspaniya çempionu olub

“Barselona” 2025/26-cı illər mövsümündə İspaniya çempionluğunu vaxtından əvvəl təmin edib.

Paraqraf.com-un məlumatına görə, Kataloniya klubu XXXV turda evdə “Real Madrid”i 2:0 hesabı ilə məğlub edib.

Oyun “Kamp Nou” stadionunda baş tutub. Qaliblərin qollarını 9-cu dəqiqədə Markus Reşford, 18-ci dəqiqədə isə Ferran Torres vurub.

Bu qələbədən sonra “Barselona”nın 91 xalı var və çempionatın başa çatmasına üç tur qalmış ikinci yerdə olan “Real Madrid”dən 14 xal öndədir.

Beləliklə, Kataloniya klubu 29-cu dəfə İspaniya çempionu olub. “Real Madrid” turnirdə 36 dəfə qalib gələrək ən çox titul rekorduna sahibdir.

Mediada yayılan məlumatlara görə, oyun 10 may gecəsi vəfat edən “Barselona”nın baş məşqçisi Hans-Dieter Flikin atasının xatirəsinə bir dəqiqəlik sükutla başlayıb.

 

Paraqraf.com