Gömrük sərhədini keçdikdən sonra altı ay ərzində rəsmiləşdirilməyən mallar və nəqliyyat vasitələrinin dövlət mülkiyyətinə keçirilməsi təklif olunur. Bu məsələ Gömrük Məcəlləsinə ediləcək dəyişiklik layihəsində öz əksini tapıb.
Sənədə əsasən, gömrük sərhədini keçdiyi gündən altı ay müddətində rəsmiləşdirilməmiş və ya rəsmiləşdirilməsi başa çatmamış mallar və nəqliyyat vasitələri dövlət mülkiyyətinə keçiriləcək.
Qeyd edək ki, sənəd Milli Məclisin mayın 1-də keçiriləcək plenar iclasının gündəliyində yer alıb.
Nəqiliyyat eksperti Adil Nəbiyev “Paraqraf.com”a bildirib ki, Gömrük Məcəlləsinə təklif edilən dəyişiklikdə nəzərdə tutulan əsas məqam-gömrük sərhədini keçdiyi gündən etibarən altı ay müddətində rəsmiləşdirilməmiş mallar və nəqliyyat vasitələri artıq dövlət mülkiyyətinə keçiriləcək:
“Bu yanaşma bir tərəfdən gömrük prosedurlarının sürətləndirilməsinə, digər tərəfdən isə qeyri-rəsmi dövriyyənin və qanunsuz saxlanılan yüklərin qarşısının alınmasına xidmət edir. Bu dəyişiklik praktiki baxımdan o deməkdir ki, idxalçı və ya daşıyıcı şəxs malı ölkəyə gətirdikdən sonra onu uzun müddət “gözləmə rejimində” saxlaya bilməyəcək və mütləq şəkildə qanunvericiliyin tələb etdiyi qaydada bəyan edib rəsmiləşdirməlidir.
Əks halda, həmin əmlak üzərində hüququnu itirmək riski ilə üzləşəcək. Bu isə xüsusilə logistika, ticarət və fərdi idxal fəaliyyəti ilə məşğul olan şəxslər üçün məsuliyyəti ciddi şəkildə artırır”.
Ekspert qeyd edib ki, Gömrük Məcəlləsinə təklif edilən dəyişiklik dövlət üçün əlavə üstünlüklər yaradır:
“Çünki uzun müddət sahibsiz və ya rəsmiləşdirilməmiş qalan malların uçotu, saxlanması və nəzarəti ilə bağlı xərclər azalır, büdcəyə potensial daxilolmalar artır və gömrük orqanlarının işi daha şəffaf və operativ hala gəlir. Lakin bu dəyişiklik müəyyən riskləri də özündə ehtiva edir. Çünki bəzi hallarda sənədləşmə gecikmələri obyektiv səbəblərdən yarana bilər və bu zaman sahibkarların zərərə düşməməsi üçün əlavə izahat mexanizmləri və ya istisna halların dəqiq tənzimlənməsi vacib olur. Əks halda, qərar sərt tətbiq olunduqda kiçik və orta biznes subyektləri üçün əlavə çətinliklər yarada bilər. Buna görə də, bu dəyişiklik yalnız inzibati nəzarət aləti kimi deyil, həm də iqtisadi mühitə təsiri baxımından balanslı şəkildə tətbiq olunmalıdır”.
Kəmalə Vəliyeva
Paraqraf.com
