Metaverse və virtual həyat anlayışı son illərdə texnologiyanın sürətli inkişafı ilə daha çox gündəmə gəlib. Artıq insanlar yalnız real deyil, rəqəmsal mühitlərdə də ünsiyyət qurur, işləyir və əylənirlər. Virtual reallıq və artırılmış reallıq texnologiyalarının imkanları genişləndikcə bu rəqəmsal aləmlər daha “real” görünməyə başlayır. Böyük texnologiya şirkətləri də bu sahəyə ciddi investisiyalar yatıraraq metaverseni gələcəyin əsas platformalarından biri kimi təqdim edir.
Mövzu ilə bağlı psixoloq Ülviyyə Murtuzova “Paraqraf.com”a açıqlamasında bildirib ki, tam şəkildə virtual aləmdə yaşamaq real görünmür:
“İnsanların bu sahəyə marağı olsa da, bunun davamlı olması mümkün deyil. Süni intellekt müəyyən sahələr üzrə məlumatları analiz etsə də, o düşünən beyin deyil və təqdim etdiyi bilgilər də hazır məlumat bazalarına əsaslanır. Bu səbəbdən virtual aləmin cazibəsi uzunmüddətli ola bilməz. Reallıq anlayışı hər zaman insanın gerçək həyatla əlaqəsinə söykənəcək”.
Kəmalə Vəliyeva
Paraqraf.com
