Hərbi xidmətlə bağlı qanunvericilik çərçivəsində çağırış yaşına çatmış vətəndaşların ölkədən çıxışı və geri qayıdışı məsələsi tez-tez müzakirə mövzusuna çevrilir. Xüsusilə, 30 yaş tamam olmadan ölkəni tərk edən və bu müddətdə hərbi xidmət keçməyən şəxslərin sonradan geri dönüşü hüquqi baxımdan bir sıra suallar doğurur. Bu kimi hallar həm hərbi uçot qaydalarının icrası, həm də vətəndaşın məsuliyyəti kontekstində qiymətləndirilir və praktiki tətbiqdə müxtəlif yanaşmalarla müşayiət oluna bilər.
Səfərbərlik və Hərbi Xidmətə Çağırış üzrə Dövlət Xidmətinin İctimaiyyətlə İş və Beynəlxalq Əlaqələr şöbəsinin rəisi Pərviz Sədrəddinov “Paraqraf.com”a bildirib ki, Azərbaycan Respublikası Cinayət Məcəlləsinin 321-ci maddəsinə əsasən, qanuni əsas olmadan hərbi xidmətdən yayınmaq üçün növbəti hərbi çağırışdan və ya səfərbərlik üzrə çağırışdan boyun qaçırma iki ilədək müddətə azadlıqdan məhrum etmə ilə cəzalandırılır:
“Burada “çağırışdan boyun qaçırma” dedikdə vətəndaşların üzrlü səbəblər olmadan tibbi müayinəyə (tibbi şəhadətləndirilməyə), müddətli həqiqi hərbi xidmətə, toplanışlara və səfərbərlik üzrə hərbi xidmətə çağırış üzrə gəlməməsi başa düşülür. Miqrasiya Məcəlləsinin 9.3.5-1-ci maddəsinin tələblərinə görə isə müddətli həqiqi hərbi xidmətə çağırışdan boyun qaçıran çağırışçıların ölkədən getmək hüququ barələrində çağırış üzrə qərar qəbul edilənədək məhdudlaşdırılır. Yəni ölkədən çıxışa tətbiq olunmuş məhdudiyyət yalnız çağırışçı barəsində qanunamüvafiq qərar (müddətli həqiqi hərbi xidmətə çağırılma, çağırışa möhlət verilməsi və ya çağırışdan azad olunma) qəbul edildikdən sonra aradan qaldırılır. Azərbaycanda hərbi xidmətə çağırışın son yaş həddi 30 yaş müəyyən edilmişdir. 30 yaşı tamam olanadək heç bir əsas olmadan müddətli həqiqi hərbi xidmətə çağırışdan yayınmış şəxslərin əməllərinə hüquqi qiymət verildikdən sonra onlar barəsində qanunamüvafiq qərarlar qəbul edilir və yalnız bundan sonra onların ölkədən çıxışına tətbiq edilmiş məhdudiyyət aradan qaldırılır”.
Kəmalə Vəliyeva
Paraqraf.com
