Son illərdə Azərbaycanda nağdsız ödənişlərin genişlənməsi iqtisadiyyatın daha şəffaf olması məqsədilə fəal şəkildə təşviq olunur. Rəqəmsal ödənişlərin əməliyyatların izlənməsini asanlaşdırması fonunda nağd dövriyyənin hələ də qalması müəyyən suallar doğurur.
Bəs nağdsız ödənişlər şəffaflıq üçün nə dərəcədə əhəmiyyətlidir?
İqtisadçı-ekspert Razi Abbasbəyli “Paraqraf.com”a açıqlamasında bildirib ki, nağdsız əməliyyatların artması vergi uçotunda şəffaflığı təmin etməklə iqtisadiyyatın sağlam inkişafına töhfə verir:
“Son illərdə nağdsız əməliyyatların genişlənməsi müsbət nəticələr yaradıb. Rəqəmsallaşma müasir iqtisadiyyatın əsas tələblərindəndir. İqtisadi şəffaflığın təmin olunması baxımından nağdsız ödənişlər mühüm rol oynayır. İlk növbədə, bu proses ölkənin investisiya reytinqini yüksəldir. Həm Dünya Bankı, həm də Beynəlxalq Valyuta Fondunun son iki ildə elan etdiyi hesabatlarda Azərbaycanın investisiya göstəricilərində ciddi artım müşahidə olunub. Kreditləşmə üzrə risk dərəcəsi bir pillədən çox aşağı düşüb ki, bu da xarici investisiyaların cəlbində müsbət dinamika göstərir”.
Ekspert əlavə edib ki, nağdsız ödənişlərin genişlənməsi vergi uçotunda şəffaflığın güclənməsinə, bunun isə qeyri-neft sektorunun inkişafına təkan verdiyini göstərir:
“Bu baxımdan, nağdsız əməliyyatların geniş tətbiqi artıq dövrün tələbidir”.
Razi Abbasbəyli onu da vurğulayıb ki, bütün sahələrdə yalnız rəqəmsal ödənişə keçid gözlənilmir və nağd əməliyyatların mövcudluğu müəyyən sektorlar üçün vacib olaraq qalacaq:
“Xüsusilə istehlak bazarında, aqrar sahədə, kənd təsərrüfatı məhsullarının alış-satış proseslərində nağd ödənişlərin davam etməsi təbiidir. Aqrar sektorun xüsusiyyətləri nəzərə alınanda nağd dövriyyənin qalması bəzi hallarda müsbət tendensiya sayıla bilər. Lakin burada da nəzərə alınmalı istisna məqamlar mövcuddur”.
Kəmalə Vəliyeva
Paraqraf.com
