Trampın “emosional” ikili standartı

Donald Tramp “narkotiklərlə mübarizə” bəhanəsi ilə Venesuela və Kolumbiya kimi ABŞ-lə yaxın olmayan ölkələri hədələdiyi halda, narkotik ticarətində mühüm rol oynayan Ekvador, Boliviya və Peru kimi ölkələrə qarşı susqunluq nümayiş etdirir.

Paraqraf.com xarici mediaya istinadən xəbər verir ki, Venesuela ilə münasibətlərin gərginləşdiyi bir dövrdə Donald Tramp Kolumbiya Prezidenti Qustavo Petronu növbəti dəfə hədəfə alıb.

Tramp Kolumbiyanın “həddən artıq çox narkotik istehsal etdiyini” iddia edərək, Petronun “oyanmadığı təqdirdə növbəti hədəf olacağını” bildirib.

Bu açıqlama ABŞ Dövlət Departamentinin artıq “Qızıl Kartel tərəfindən idarə olunduğu” iddia edilən Venesuelanı hədəfə almasının ardınca səsləndirilib. Tramp Kolumbiyada fəaliyyət göstərən “narkotik fabriklərindən” danışaraq, ölkənin birbaşa ABŞ-yə kokain ixrac etdiyini iddia edib. O, Prezident Petronu düşmənçilikdə günahlandıraraq, mövcud vəziyyəti dərk etməyəcəyi halda Kolumbiyanı “ciddi problemlərin” gözlədiyini vurğulayıb.

Digər tərəfdən, Venesuela rəsmiləri dəfələrlə ABŞ-ni Sakit okean marşrutu ilə Quitonu tərk edən narkotik daşımalarına daha çox diqqət yetirməyə çağırıblar. Buna baxmayaraq, Ekvadorda ABŞ hərbi bazaları ilə bağlı referendum ərəfəsində ABŞ Dövlət katibi Marko Rubio Ekvador Prezidenti Daniel Noboanı “narkotik terrorizmlə mübarizədə nümunəvi lider” kimi qiymətləndirib.

Kəmalə Vəliyeva
Paraqraf.com