ABŞ Türkiyənin “F-35” proqramına qayıtması ilə bağlı inadından dönmür

Ankara ABŞ-nin “F-35” qırıcı təyyarələri proqramında iştiraka qayıtmaq üçün Rusiyanın “S-400” zenit-raket komplekslərindən imtina etməlidir, bu istiqamətdə danışıqlar davam edir.

Paraqraf.com xəbər verir ki, bu barədə ABŞ-nin Türkiyədəki səfiri Tom Barrak öz “X” hesabında yazıb.

“ABŞ qanunlarına uyğun olaraq, Türkiyə “F-35” proqramına qayıtmaq üçün bundan sonra “S-400″ sistemlərini istismar etməməli və ya onlara sahib olmamalıdır”, – deyə o bildirib.

Diplomat qeyd edib ki, ABŞ və Türkiyə prezidentləri Donald Tramp və Rəcəb Tayyib Ərdoğan arasındakı münasibətlərin hazırkı səviyyəsi yeni əməkdaşlıq atmosferi yaradıb və bu da son 10 ildə bu mövzuda aparılan ən məhsuldar danışıqlara gətirib çıxarıb.

“Ümid edirik ki, qarşıdakı aylarda bu danışıqlar həm ABŞ-nin, həm də Türkiyənin təhlükəsizlik tələblərinə cavab verəcək bir irəliləyişə səbəb olacaq”, – deyə səfir vurğulayıb.

Xatırladaq ki, ABŞ Türkiyəni 2019-cu ildə müqavilə əsasında Rusiyanın “S-400” zenit-raket komplekslərini aldıqdan sonra “F-35” qırıcıları proqramından kənarlaşdırıb.

Paraqraf.com