Bu il hotellərin 75 faizi boş qalıb: Ən aşağı göstərici Laçında olub

2025-ci ilin yanvar-sentyabr aylarında ölkədə mehmanxana və mehmanxana tipli obyektlərin birdəfəlik tutumundan istifadə səviyyəsi 25 faiz olub. Bu, ötən ilin eyni dövrü ilə müqayisədə (24.8 faiz) cüzi artımı göstərir.

Paraqraf.com rəsmi statistikaya istinadən xəbər verir ki, ən yüksək tutum səviyyəsi Şabranda qeydə alınıb və 46.9 faiz təşkil edib. Onu 46.7 faizlə Naftalan, 36.9 faizlə Bakı, 33.4 faizlə Qusar, 27.4 faizlə Sabirabad izləyib.

Ən aşağı göstəricilər isə Laçın rayonunda müşahidə olunub. Laçında tutum səviyyəsi 16.4 faiz. Digər aşağı səviyyələr sırasına Xaçmaz (16.5 faiz), Qax (17.4 faiz), Biləsuvar (18.2 faiz) və Bərdə (19.4 faiz) daxildir.

Qeyd edək ki, 2025-ci ilin yanvar-sentyabr aylarında mehmanxana (hotel) və mehmanxana tipli obyektlərdə keçirilmiş gecələmələrin sayı 2024-cü ilin yanvar-sentyabr ayları ilə müqayisədə 6.1 faiz artaraq 3 milyon 469.3 min olub.

Paraqraf.com