Səhər məktəbin həyətindən gələn uşaq səs-küyü, açılan kitabların qoxusu… Hər biri bir adla başlayır – müəllim.
Müəllimlik dünya üzrə mövcud olan bir peşədir. Hər birimizin həyatına iz qoyan, müəllim sözü gələndə xatirələrini folduran biri vardır. Kiminsə təmkinli səsi, kiminsə sərt, amma ədalətli baxışı, kiminsə isə sadəcə bir cümləsi illərlə qulağımızda səslənir. Bəzən elə bir cümlə olur ki, bütün həyatımıza çıraq olur.
Müəllimlik sadəcə bir peşə deyil. Bu, zamanla yarışan bir missiyadır.
Texnologiya dəyişir, dərslər onlayn olur, kitablar elektron formaya keçir, amma müəllimin səsi, baxışı, diqqəti hələ də hər bir uşağın gələcəyini formalaşdırır.
İllər keçir, sinif otaqları dəyişir, amma müəllimin qoyduğu iz silinmir. Çünki o iz kitabda yox, ürəklərdə qalır.
Bu gün, 5 oktyabrda, bəlkə də bir çoxumuzun müəllimi artıq məktəbdə deyil. Bəziləri təqaüddədir, bəziləri başqa şəhərdə, bəziləri isə artıq bu dünyada yoxdur. Amma onların öyrətdikləri hələ də yaşayır hər düzgün qərarımızda, hər ədalətli davranışımızda, hər bir yazdığımız sözün içində.
Müəllimlik görünməz qəhrəmanlıqdır.
Bir şam kimi yanıb başqalarına işıq vermək, hər səhər eyni səbir və eyni sevgi ilə sinfə girmək, hər fərqli uşaqda bir gələcək görə bilmək.
Bəli, Müəllimlər Günü bir təqvim tarixidir. Amma hər gün, bir müəllimin nəsə öyrətdiyi, bir uşağın “başa düşdüm, müəllim!” dediyi andır əsl bayram.
Əziz müəllimlər, siz yalnız dərs öyrətmirsiniz siz insan olmağı öyrədirsiniz.
Bütün çətinliklərə, yorğunluğa və bəzən dəyərləndirilməməyə baxmayaraq, siz bu dünyanın ən dəyərli işini görürsünüz.
Zaman səni dəyişə bilmədi, texnologiya səni əvəz edə bilmədi. Çünki hər insanın hekayəsi bir müəllimlə başlayır. Müəllimlər gününüz mübarək. Zaman səni dəyişə bilmədi, texnologiya səni əvəz edə bilmədi. Çünki hər insanın hekayəsi bir müəllimlə başlayır.
Müəllimlər gününüz mübarək.
N.Mehdiyeva
Paraqraf.com
