“Santos”un futbolçusu Neymar Braziliya millisindəki komanda yoldaşı Rafinyanın “Qızıl top” səsverməsində beşinci yeri tutmasına etiraz edib.
Paraqraf.com xəbər verir ki, o, bu haqda sosial şəbəkə hesabında yazıb.
2024/25 mövsümünün ən yaxşı futbolçusu mükafatını PSJ-nin hücumçusu Usman Dembele qazanıb. Səsvermədə ikinci yeri “Barselona”nın vingeri Lamin Yamal, üçüncü yeri PSJ-dən Vitinya, dördüncü yeri isə “Liverpul”dan Məhəmməd Salah tutub.
“Rafinyanı beşinci yerə qoymaq həddindən artıq ədalətsizlikdir”, – Neymar yazıb.
Ötən mövsüm Rafinya bütün turnirlərdə “Barselona”nın heyətində 57 oyun keçirib, 34 qol vurub və 25 məhsuldar ötürmə edib. Komanda ilə birlikdə o, İspaniya çempionluğu, kuboku və Superkuboku qazanıb.
Kəmalə Vəliyeva, Paraqraf.com
