YouTube-un ilk videosu Londondakı muzeyin kolleksiyasına daxil edildi

Londonda yerləşən “Victoria and Albert Museum” (V&A) YouTube platformasına yüklənən ilk videonu kolleksiyasına daxil edib. Söhbət platformanın həmtəsisçisi Cevid Karim tərəfindən 23 aprel 2005-ci ildə paylaşılan “Me at the zoo” adlı 19 saniyəlik videodan gedir.

BAKU.WS xarici mediaya istinadən xəbər verir ki, San-Dieqo zooparkında fillərin fonunda çəkilən görüntülər bu günədək 382 milyondan çox baxış və 18 milyondan artıq bəyənmə toplayıb.

Muzeyin rəqəmsal mühafizə komandası həmçinin 8 dekabr 2006-cı il tarixli YouTube səhifəsinin dizaynını və istifadəçi təcrübəsini yenidən qurub. Bu proses 18 ay davam edib və platformanın istifadəçi təcrübəsi komandası, eləcə də London mərkəzli dizayn studiyası ilə əməkdaşlıq çərçivəsində həyata keçirilib.

V&A nümayəndələri bildiriblər ki, bu addım internet və rəqəmsal dizayn tarixində mühüm mərhələ hesab olunan bir anın qorunmasına xidmət edir. YouTube rəhbərliyi isə layihənin qlobal mədəni fenomenin başlanğıcını nümayiş etdirdiyini vurğulayıb.

Eksponat hazırda V&A South Kensington-da yerləşən “Design 1900-Now” qalereyasında ziyarətçilərə təqdim olunur. Yenidənqurma prosesi ilə bağlı əlavə materiallar isə Stratforddakı V&A East Storehouse-da nümayiş etdiriləcək.

Paraqraf.com