ABŞ hantavirus epidemiyası ilə mübarizənin başa çatdığını elan etdi

ABŞ-da hantavirus infeksiyasının yayılmasına qarşı aparılan mübarizənin aktiv mərhələsi rəsmi olaraq başa çatmış hesab olunur. Bu barədə ABŞ Xəstəliklərə Nəzarət və Profilaktika Mərkəzinin (“CDC”) direktoru Cey Bhattaçariya bildirib.

Paraqraf.com xəbər verir ki, bəlumatı “The Wall Street Journal” yayıb.

Rəsmisinin sözlərinə görə, qəbul edilən qərar hökumətin indiyədək hantavirusun qarşısının alınmasına yönəltdiyi əhəmiyyətli maddi və insan resurslarını digər istiqamətlərə yönəltməyə imkan verəcək.

Bhattaçariya qeyd edib ki, epidemiyanın pik dövründə onunla mübarizəyə “CDC”nin 100-dən çox mütəxəssisi cəlb olunmuşdu. İndi həmin əməkdaşlar digər prioritet vəzifələr üzərində işləyə biləcəklər.

Bu həftənin əvvəlində hantavirusun yayıldığı əsas ocaqlardan biri hesab edilən “MV Hondius” kruiz gəmisində olan 18 ABŞ vətəndaşının hamısı təcrid rejimindən azad edilib.

Ümumdünya Səhiyyə Təşkilatı (ÜST) gəminin üç sərnişininin həyatını itirdiyini təsdiqləyib. Hazırda isə kruiz gəmisi artıq yeni səfərinə başlayıb.

Ötən həftə ÜST-ün baş direktoru Tedros Adhanom Qebreyesus bildirib ki, son üç həftə ərzində dünyada hantavirus infeksiyasına yeni yoluxma halı qeydə alınmayıb. Eyni zamanda, bir aydan artıqdır ki, xəstəliklə bağlı ölüm faktı da qeydə alınmayıb.