İsrailin Livanın cənubuna hücumunda 11 nəfər həlak olub

İsrailin Livanın cənubuna hücumu nəticəsində 11 nəfər həlak olub, 8 nəfər yaralanıb.

Paraqraf.com “Mehr” Xəbər Agentliyinə istinadən xəbər veri ki, bu barədə Livanın Səhiyyə Nazirliyi məlumat yayıb.

Bildirilib ki, İsrailin Livanın cənubundakı Məruf, Abbasiyə və Teyr Dəbba kəndlərinə təşkil etdiyi hava hücumlarında biri xilasedici olmaqla, 11 nəfər ölüb, daha 8 nəfər isə yaralanıb.

Həmçinin İsrailin Qəlaviyə və Tulin qəsəbələrini iki dəfə hava zərbələri ilə, Livanın cənubundakı Ən-Nəbətiyə rayonunun Haruf qəsəbəsini isə artilleriya atəşi ilə hədəfə aldığı qeyd olunub.

Xatırladaq ki, 2026-cı il fevralın 28-də ABŞ və İsrail İrana qarşı hərbi əməliyyatlara başlayıb və bir sıra şəhərlərə hava zərbələri endirib. Həmin gün endirilən zərbələr nəticəsində İranın ali rəhbəri Əli Xamenei öldürülüb. Buna cavab olaraq İran İsrail ərazisinə raket zərbələri endirib və Fars körfəzi ölkələrindəki Amerika hərbi bazalarına hücum edib.

“Hizbullah” İsraili raket və pilotsuz uçuş aparatları ilə atəşə tutaraq İran tərəfindən müharibəyə qoşulduqdan sonra İsrail Müdafiə Qüvvələri Livanın cənubuna və radikal qruplaşmanın infrastrukturunun yerləşdiyi Beyrutun cənub ətraflarına zərbələr endirib. İsrail həmçinin Livanın cənubunda quru əməliyyatını genişləndirib.

İran, ABŞ və onların müttəfiqləri aprelin 8-nə keçən gecə iki həftəlik atəşkəs barədə razılığa gəliblər. ABŞ Prezidenti Donald Tramp sonra atəşkəsi qeyri-müəyyən müddətə uzadıb.

Aprelin 14-də Vaşinqtonda ABŞ-nin himayəsi altında Livan-İsrail təmaslarının ilkin mərhələsi baş tutub. Orada atəşkəs razılaşmasının əldə edilməsi məqsədilə sülh danışıqlarının başlama tarixi müəyyən edilməli idi. Nümayəndə heyətlərinə Livan və İsrailin Birləşmiş Ştatlardakı səfirləri rəhbərlik ediblər.

Aprelin 16-da ABŞ Prezidenti Donald Tramp İsrail və Livanın 10 günlük atəşkəs rejiminin tətbiq olunması barədə razılığa gəldiyini bildirib. ABŞ Dövlət Departamentinin mətbuat katibi Tommi Piqott isə mayın 15-də atəşkəs rejiminin daha 45 gün uzadılacağını açıqlayıb.

 

Paraqraf.com