Azərbaycan WUF13-də “ağıllı yaşayış məntəqələri” konsepsiyasını təklif edib

Azərbaycan məcburi köçkünlərin təhlükəsiz qayıdışı üçün nəzərdə tutulan “ağıllı yaşayış məntəqələri” konsepsiyasını təqdim edib.

Paraqraf.com xəbər verir ki, bunu Azərbaycan Xarici İşlər Nazirliyinin xüsusi tapşırıqlar üzrə səfiri Elşad İsgəndərov Bakıda keçirilən Ümumdünya Şəhərsalma Forumunun 13-cü sessiyası (WUF13) çərçivəsində “Qeyri-sabit və münaqişələrdən zərər çəkmiş ərazilərdə şəhər həlləri vasitəsilə iqlimə sülhyönümlü müsbət təsir” adlı panel sessiyasında bildirib.

E. İsgəndərov iştirakçıları məcburi köçkünlərin etibarlı qayıdışını təmin edən, texnoloji və həyat qabiliyyətli yaşayış məskənlərinin formalaşdırılmasına yönəlmiş kompleks həllər toplusu olan “Təhlükəsiz qayıdış üçün ağıllı və dayanıqlı yaşayış məntəqələri” (4SRP) təşəbbüsü ilə tanış edib.

“Burada biz Zəngilan təcrübəsinə və ümumilikdə azad edilmiş ərazilərin bərpası üzrə Azərbaycan təcrübəsinə, xüsusən də təhlükəsiz qayıdış üçün ağıllı və dayanıqlı yaşayış məskənlərinin nümunəvi modeli kimi qəbul edilən Zəngilana əsaslanmaq niyyətindəyik. Bu təşəbbüs, mahiyyət etibarilə, mövcud çağırışlara olan bütün cavabları əhatə edir. Bu tərəfdaşlıq və onun daha da detallı işlənməsi üçün operativ ekspert işçi qrupunun formalaşdırılması barədə qərarımız çərçivəsində artıq iki əsas istiqamət müəyyənləşib. İlk növbədə, rəhbər prinsipləri işləyib hazırlamaq tələb olunur. Afrikadan Qafqaza, Asiyadan Balkanlara qədər toplanmış ən yaxşı təcrübələrə əsaslanan postmünaqişə ərazilərinin bərpası üçün aydın istiqamətlər lazımdır”, – diplomat vurğulayıb.

 

Paraqraf.com