Xocalı soyqırımının 34-cü ildönümü qeyd olundu – FOTOLAR

Xocalı soyqırımının 34-cü ildönümü ilə əlaqədar olaraq ölkəmizdə silsilə anım tədbirləri keçirilir. Hər il bu faciənin ildönümü ərəfəsində qanlı səhifəni bir daha vərəqləyərkən, hadisələrin arxasındakı siyasi və hərbi reallıqları açıq şəkildə ifadə etmək zərurəti yenidən gündəmə gəlir. Xüsusilə, keçmiş sovet ordusunun tərkibində fəaliyyət göstərmiş 366-cı motoatıcı alayın faciədə iştirakı məsələsi bir daha xatırladılır.

Fevralın 21-də Hind Klinikasının təşkilatçılığı və maliyyə dəstəyi ilə Hyatt Regency Baku hotelində Xocalı soyqırımının anım günü keçirildi. Tədbirdə Milli Məclisin deputatları, ictimaiyyət nümayəndələri, Xocalıdan olan məcburi köçkünlər və şəhid ailələri iştirak edirdilər.

Çıxışlarda Xocalı faciəsinin unudulmamasının, onun beynəlxalq ictimaiyyətə daha geniş şəkildə çatdırılmasının vacibliyi vurğulandı. Qeyd olundu ki, bu cür tədbirlər tarixi yaddaşın qorunması və gələcək nəsillərə ötürülməsi baxımından mühüm əhəmiyyət daşıyır.

Tədbirdə Xocalıda ermənilərə əsir düşmüş Elmira xanım da çıxış edərək başına gətirilən dəhşətli hadisələrdən danışdı. Onun yaşadıqları iştirakçılar tərəfindən dərin hüzn və sarsıntı ilə qarşılandı.

Anım mərasimi şəhidlərin xatirəsinin bir dəqiqəlik sükutla yad edilməsi ilə başa çatdı.

Unutmayaq, unutdurmayaq!