İraq artıq Suriyanın xüsusi düşərgələrindən və həbsxanalarından köçürülmüş 2200-dən çox keçmiş İŞİD tərəfdarı və döyüşçüsünü qəbul edib.
Paraqraf.com xəbər verir ki, məlumatı İraq təhlükəsizlik xidmətlərinin mətbuat mərkəzinin rəhbəri general-leytenant Saad Maan INA xəbər agentliyinə açıqlayıb: “İraq artıq Suriyadan gətirilən 2250 İŞİD terrorçusunu qəbul edib”.
O qeyd edib ki, İŞİD tərəfdarlarının daşınması “beynəlxalq koalisiya ilə əlaqələndirilərək hava və quru yolu ilə həyata keçirilib”. Maan vurğulayıb ki, İraq hökuməti və təhlükəsizlik qüvvələri “cinayətkarlığın təkcə İraqda deyil, bütün dünyada yayılma təhlükəsinin qarşısını almaq üçün bu qədər sayda keçmiş döyüşçünün yerləşdirilməsi və prosedur məsələlərini həll etməyə hazırdır”.
Mətbuat mərkəzinin rəhbəri bildirib ki, xüsusi qruplar artıq “təhvil verilən şəxslərin təhlükə səviyyəsinə və qrupun fəaliyyətindəki iştirakına əsasən ilkin araşdırmalara və təsnifatına başlayıblar və etirafları qeydə alınır”. Maan əlavə edib ki, İraq tərəfi İŞİD cinayətlərində iştirak edən bütün şəxsləri daxili məhkəmələrdə mühakimə etmək niyyətindədir. General qeyd edib ki, İraq Xarici İşlər Nazirliyi “terrorçu qrupun cinayətlərində iştirak edən vətəndaşlarının təhvil verilməsi ilə bağlı bir sıra ölkələrlə” əlaqə saxlayır. Onun sözlərinə görə, “İŞİD tərəfdarlarının digər ölkələrə təhvil verilməsi prosesi yalnız İraq tərəfinin təqdim etdiyi bütün qanuni tələblər yerinə yetirildikdən sonra başlayacaq”.
İraq rəsmisinin dediyinə görə, Suriyadan gətirilən İŞİD-çilər dünyanın 42 ölkəsinin vətəndaşlarıdır.
Paraqraf.com
