Valideyn övladından imtina edərsə, uşaq hansı hüquqlara malikdir? – vəkil AÇIQLADI

Bəzi hallarda valideynlər övladlarını erkən yaşlarından tərk edir, onların saxlanılması ilə bağlı öhdəliklərini yerinə yetirmir və aliment də ödəmirlər. Bu cür vəziyyətlərdə uşağın hüquqları, xüsusilə də valideyndən hər hansı maddi tələb irəli sürüb-sürə bilməməsi cəmiyyətdə tez-tez suallar doğurur.

Mövzu ilə bağlı Vəkil Lalə Salmanova “Paraqraf.com”-a açıqlamasında bildirib ki, uşağın saxlanılması üçün məhkəmə qətnaməsi ilə aliment təyin edildikdə şəxs məhkəmə qətnaməsini yerinə yetirməlidir:

“Yerinə yetirmədikdə aliment borcu yaranır və qətnaməni icra etmədiyi üçün əvvəl inzibati, sonra isə cinayət məsuliyyətinə cəlb edilə bilər. Lakin məhkəmə qaydasında aliment təyin edilmədikdə borc da yaranmır. Uşaq isə hər bir halda ata və anasının vərəsəsidir. Valideyn vəfat etdik də uşaq vərəsə kimi payını tələb edə bilər. Uşağın valideyni sağdırsa və valideyn uşağı atıbsa, bu zaman uşağın valideyndən əmlak tələb etmək kimi bir hüququ yoxdur”.

Kəmalə Vəliyeva
Paraqraf.com