Bakı–Sumqayıt yolunda nəqliyyat axınının sürətlə artması bu istiqamətdə həm yol infrastrukturunun genişləndirilməsi, həm də ictimai nəqliyyatın daha operativ təşkilinə dair sualları gündəmə gətirir. Şəhərlərarası hərəkətin intensivləşməsi, tıxacların çoxalması və gündəlik sərnişin axınının yüksəlməsi Bakı–Sumqayıt magistralının genişləndirilməsi və alternativ nəqliyyat həllərinin – o cümlədən sürətli avtobus sistemlərinin tətbiqini aktuallaşdırıb.
Mövzu ilə bağlı “Paraqraf.com”a açıqlama verən APA İnformasiya Agentliyinin redaktoru Günay Elşad qızı bildirib ki, AYNA tərəfindən əhaliyə keyfiyyətli və əlçatan ictimai nəqliyyat xidmətləri göstərilməsi istiqamətində ardıcıl tədbirlər həyata keçirilir:
“Bakı–Sumqayıt istiqamətində bir neçə yeni marşrut xətti istifadəyə verilib. Hərəkətin daha rahat və maneəsiz təşkili üçün bu marşrutlarda xüsusi hərəkət zolaqları da yaradılıb”.
Günay Elşad qızı həmçinin şəhərlərarası sürətli əlaqəni təmin edən mövcud ekspres xəttlər barədə məlumat verib:
“Bakı–Sumqayıt arasında 594 və 595 nömrəli ekspres marşrut xətləri fəaliyyət göstərir. Bu avtobuslar son dayanacaqlar arasındakı məsafəni təxminən 60 dəqiqəyə qət edir”.
Cəfərova Validə
Paraqraf.com
