Azərbaycanın UNESCO ilə əməkdaşlığı beynəlxalq səviyyədə ölkəmizin mədəni irsinin tanıdılmasına və qorunmasına mühüm töhfə verir.
Azərbaycanın UNESCO ilə əlaqələri müstəqilliyin ilk illərindən formalaşmağa başlayıb. 3 iyun 1992-ci ildə ölkəmiz təşkilata üzv qəbul edilib, 1994-cü ildə isə Ulu Öndər Heydər Əliyevin sərəncamı ilə UNESCO üzrə Azərbaycan Respublikasının Milli Komissiyası yaradılıb.
Mövzu ilə bağlı Paraqraf.com-a açıqlama verən siyasi elmlər üzrə fəlsəfə doktoru Üzeyir Mustafayev bildirib ki, Azərbaycan ilə UNESCO arasında qurulan əməkdaşlıq ölkəmizin mədəni irsinin beynəlxalq səviyyədə təbliği baxımından xüsusi əhəmiyyət daşıyır.
“İkitərəfli əlaqələrin inkişafı nəticəsində 3 maddi və 19 qeyri-maddi mədəni irs nümunəmiz UNESCO-nun müvafiq siyahılarına daxil edilib. Bu, Azərbaycanın dünya mədəni irsinin qorunmasına verdiyi dəstəyin göstəricisidir”, – deyə ekspert vurğulayıb.
Onun sözlərinə görə, Azərbaycanın beynəlxalq səviyyədə qazandığı etimadın nəticəsi kimi, 2023-cü ildə ölkəmiz UNESCO-nun 1970-ci il Konvensiyasının Yardımçı Komitəsinə üzv seçilib. Bu addım mədəni dəyərlərin qanunsuz dövriyyəsinə qarşı mübarizədə Azərbaycan üçün mühüm platforma rolunu oynayır.
Üzeyir Mustafayev əlavə edib ki, Azərbaycan yalnız öz mədəni irsini deyil, digər ölkələrdəki tarixi abidələrin qorunmasına da töhfə verir:
“Heydər Əliyev Fondunun dəstəyi ilə dünyanın bir sıra dövlətlərində, o cümlədən Vatikandakı Müqəddəs Pyotr Bazilikasında bərpa işləri həyata keçirilir. Bu, Azərbaycan mədəni diplomatiyasının parlaq nümunəsidir”.
Ekspertin sözlərinə görə, UNESCO çərçivəsində aparılan əməkdaşlıq Azərbaycanın mədəni irsinin mənşə ölkə kimi tanınmasına və beynəlxalq səviyyədə müdafiəsinə şərait yaradır. Bu istiqamətdə aparılan təmaslar, o cümlədən Suriya ilə İmaməddin Nəsiminin qəbrinin ölkəmizə gətirilməsi məsələsi də həmin prosesin tərkib hissəsidir.
Sonda Üzeyir Mustafayev qeyd edib ki, Azərbaycanın UNESCO-da əldə etdiyi uğurlar ardıcıl xarakter daşıyır.
“2021-ci ildə ölkəmiz 143 səslə UNESCO-nun İcraiyyə Şurasının üzvü seçilmişdi. Bu fakt Azərbaycanın beynəlxalq nüfuzunun artdığını bir daha sübut edir,” – deyə o bildirib.
Cəfərova Validə
Paraqraf.com
