Cəlilabad rayonunda sakinlərin rahatlığını təmin etmək məqsədilə yenidənqurma işləri sürətlə davam etdirilir. Rayon İcra Hakimiyyətinin başçısı Rafiq Cəlilov, yeni asfalt örtüyü döşənmiş küçələrdə tez-tez olur, görülən abadlıq işlərinin vəziyyəti ilə maraqlanır və aidiyyatı üzrə tapşırıq və tövsiyələrini verir.
Son 4 ildə Cəlilabad rayonunda yol infrastrukturunun yenilənməsi sahəsində böyük işlər görülüb. Belə ki, 2022-ci ildə Cəlilabad şəhərində 21 küçə (21 km), Göytəpə şəhərində 9 küçə (5.4 km), Komanlı-Bəcrəvan yolu (1.5 km), Komanlı-Həziabad yolu (1.5 km), Privolnoye kəndində şəhid ailəsinin yaşadığı küçə, Hamarqışlaq kəndində qəbirstanlığa və məktəbə gedən yol, Təklə-Abazallı, Təklə-Məlikqasımlı, Şötüklü-Şorbaçı, Şiləvəngə-Adnalı-Bədirli kəndlərarası yollar (36.2 km) təmir edilmişdir. Ümumilikdə 65.7 km yol çəkilmişdir. 2023-cü ildə isə Cəlilabad rayonu üzrə 10 km uzunluğunda 30 küçəyə asfalt örtüyü vurulmuşdur.
2024-cü ildə rayonun yaşayış məntəqələrində 23 küçədə 8.5 km-dən çox asfaltlaşdırma işləri aparılmışdır. 2025-ci ildə isə bu istiqamətdə işlər davam etdirilmiş və il ərzində nəzərdə tutulan 25 küçəyə 8.2 km məsafədə asfalt örtüyü vurulmuşdur.
Qeyd edək ki, Cəlilabad şəhərində küçələrin asfaltlaşdırılması və yolların təmiri mərhələli şəkildə həyata keçirilir. Aparılan işlərin gedişi göstərir ki, bu işlər yaxın 1-2 il ərzində tam başa çatdırılacaq və yol-nəqliyyat infrastrukturunun təkmilləşdirilməsi istiqamətində əlavə tədbirlər həyata keçiriləcəkdir.
Cəlilabad rayonunda yollara yeni asfalt örtüyünün döşənməsi və yol infrastrukturunun inkişafı ilə bağlı görülən işlər rayon sakinləri tərəfindən böyük razılıq və məmnunluqla qarşılanır. Sakinlər, görülən işlərə görə Azərbaycan Prezidenti İlham Əliyevə, Cəlilabad Rayon İcra Hakimiyyəti başçısı Rafiq Cəlilova və əməyi olan hər kəsə öz minnətdarlıqlarını bildirirlər.
Elçin Hüseynov,
Cəlilabad Bələdiyyəsi sədrinin müavini
