İƏT ölkələri qarşılıqlı ticarət və investisiyalardakı maneələri aradan qaldırmağa çağırıb
Bakıda keçirilən İslam Əməkdaşlıq Təşkilatına (İƏT) üzv dövlətlərin Parlament İttifaqı Konfransının 20-ci sessiyasının iştirakçıları inkişafa dəstək olmaq və İslam dünyasının qarşısında duran çoxsaylı çağırışların öhdəsindən gəlmək üçün İslam dövlətlərinin iqtisadi əməkdaşlığının, inteqrasiyasının gücləndirilməsinin vacibliyini vurğulayıblar.
Paraqraf.com xəbər verir ki, bu, konfransın yekunlarına əsasən qəbul edilmiş Bakı Bəyannaməsində öz əksini tapıb.
Sənəddə davamlı, şaxələndirilmiş, dayanıqlı və inklüziv iqtisadi artımın təşviqi, investisiyaların, sənaye əməkdaşlığının artırılması və regional istehsal-satış zəncirlərinin inkişafı yolu ilə İƏT-ə üzv dövlətlər arasında iqtisadi əməkdaşlığın gücləndirilməsinə sadiqlik təsdiq edilib.
“Üzv dövlətlərin parlamentlərini İƏT çərçivəsində qarşılıqlı ticarət və investisiyalarda maneələrin aradan qaldırılmasına, ticarətin asanlaşdırılması üzrə tədbirlərin inkişafına, gömrük əməkdaşlığının genişləndirilməsinə və İƏT-in mövcud ticari-iqtisadi mexanizmlərinin effektiv şəkildə icrasına töhfə verməyə çağırırıq”, – bəyanatda qeyd olunub.
Bakı Bəyannaməsində həmçinin İƏT-ə üzv dövlətlərin regional qarşılıqlı əlaqələrinin möhkəmləndirilməsinə, ticarətin genişləndirilməsinə və dayanıqlı iqtisadi inteqrasiyasına yönəlmiş təhlükəsiz, dayanıqlı və qarşılıqlı əlaqəli nəqliyyat, tranzit və logistika dəhlizlərinin inkişafına dəstək təsdiq edilib.
Bəyannamədə həmçinin üzv dövlətlərin milli şərtləri və inkişaf prioritetləri nəzərə alınmaqla enerji təhlükəsizliyi, bərpa olunan enerji mənbələrinin inkişafı, enerji səmərəliliyinin artırılması, “yaşıl texnologiyalar”ın tətbiqi və dayanıqlı enerji keçidi sahəsində əməkdaşlığa dəstək ifadə olunub.
Bundan əlavə, sənəddə İƏT-ə üzv dövlətlərə dayanıqlı inkişafı təşviq etmək, indiki və gələcək nəsillərin maraqları naminə beynəlxalq iqlim öhdəliklərini yerinə yetirmək məqsədilə əlaqələndirilmiş fəaliyyətlər vasitəsilə iqlim dəyişikliyinə qarşı mübarizədə əməkdaşlığı gücləndirmək barədə çağırış yer alıb.
Bundan başqa, sənəddə İƏT-ə üzv dövlətlərin dayanıqlı inkişafının təmin edilməsi üçün dayanıqlı infrastruktura investisiyaların səfərbər edilməsi və “yaşıl layihələr”in maliyyələşdirilməsi mexanizmlərinin inkişaf etdirilməsi zərurəti vurğulanıb.
Paraqraf.com
