Dominikanda özəl təyyarə qəzaya uğrayıb, ölənlər var

Dominikan Respublikasının cənub sahilindəki La-Romana şəhəri yaxınlığında baş verən təyyarə qəzasında Amerika qeydiyyatlı kiçik özəl təyyarənin iki pilotu həlak olub.

Paraqraf.com-un “La Nacion” qəzetinə istinadən verdiyi məlumata görə, qəza şəhərin hava limanına təcili eniş zamanı baş verib.

Belə ki, təyyarə eniş edərkən partlayıb və hər iki pilot hadisə yerində ölüb.

Medianın məlumatına görə, təyyarə Puerto-Rikodan qalxıb və Hyustona gedirmiş. Dominikan Mülki Aviasiya İnstitutunun məlumatına görə, təyyarənin pilotu La-Romanadan 16 dəniz mili məsafədə olarkən texniki nasazlıq səbəbindən təcili eniş tələb edib.

Qeyd olunub ki, təyyarə ABŞ-də biznes aviasiyası ilə məşğul olan bir şirkətdə qeydiyyatdan keçib. Ölən iki pilotdan başqa, göyərtədə başqa heç kim olmayıb.

 

Paraqraf.com