“Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı” ölkədə mənzil təminatına düşən yükün azalmasına kömək edir.
Paraqraf.com xəbər verir ki, bunu Azərbaycanın iqtisadiyyat naziri Mikayıl Cabbarov Bakıda keçirilən Ümümdünya Şəhərsalma Forumunun 13-cü sessiyası (WUF13) çərçivəsində keçirilən “Qeyri-rəsmi yaşayış məntəqələrinin və gecəqonduların transformasiyası: dünya üçün mənzil təminatı” adlı dialoq sessiyasında deyib.
Onun sözlərinə görə, Azərbaycanda 2003-cü ildən yeni mərhələ başlayıb:
“Məhz bu dövrdə ölkə iqtisadi baxımdan kifayət qədər güclü və sabit oldu, nəticədə əvvəlcə məcburi köçkünlərin və qaçqınların məskunlaşdığı müvəqqəti düşərgələrin ləğvinə başlanıldı. Beləliklə, 2003-2020-ci illər məhz bu proseslərlə xarakterizə olunan mərhələ idi. 2020-ci ildən başlayaraq bu günədək davam edən dövr isə əsasən “Böyük Qayıdış” prosesi ilə yadda qalır. 30 ildən artıq müddətdən sonra insanlar nəhayət öz doğma torpaqlarına qayıdırlar. Azad edilmiş ərazilərə sakinlərin qayıdışı ölkədə mənzil təminatına düşən yükün azalmasına kömək edir”.
Paraqraf.com
