UNECA Afrika üçün kritik əhəmiyyətli məqamda WUF13-ün keçirilməsinə görə Azərbaycanı təşəkkür edib
BMT-nin Afrika üçün İqtisadi Komissiyası (UNECA) Bakıda Ümumdünya Şəhərsalma Forumunun 13-cü sessiyasının (WUF13) yüksək səviyyədə təşkilinə görə Azərbaycan hökumətinə minnətdarlığını bildirib.
Paraqraf.com-un məlumatına görə, bunu UNECA-nın nümayəndəsi Cüzeppe Tesoriere WUF13 çərçivəsində Afrika ölkələrinin regional nazirlər görüşündə bəyan edib.
O, həmçinin forumun “Dünyanı mənzillə təmin etmək: təhlükəsiz və dayanıqlı şəhərlər və icmalar” mövzusunu son dərəcə ilhamverici adlandırıb.
Onun sözlərinə görə, forum Afrikanın şəhər inkişafı üçün kritik əhəmiyyətli məqamda – sürətli urbanizasiya, sosial bərabərsizliyin artması və güclənən iqlim riskləri fonunda keçirilir. Tesoriere vurğulayıb ki, bu zaman siyasi öhdəliklərin real tədbirlərə çevrilməsi üçün vaxt daralmaqdadır.
O, UNECA-nın üzv dövlətlərə və tərəfdaşlara davamlı urbanizasiyanın həyata keçirilməsində dəstəyini davam etdirmək niyyətində olduğunu vurğulayıb.
“BMT-nin Afrika üçün İqtisadi Komissiyası bu səylərdə üzv dövlətlərə dəstək verməyə və bütün tərəfdaşlarla əməkdaşlığa sadiqliyini təsdiqləyir. Biz daxili resursların səfərbər edilməsində, məlumatlara əsaslanan şəhər planlamasının irəli aparılmasında, yerli hakimiyyət orqanlarının potensialının gücləndirilməsində, həmçinin davamlı urbanizasiyanın potensialının tam üzə çıxarılması üçün zəruri olan analitik və siyasi dəstəyin göstərilməsində ölkələrə kömək etməyə hazırıq”, – UNECA-nın nümayəndəsi bəyan edib.
Onun sözlərinə görə, indiki müzakirələr Nayrobi Bəyannaməsində təsbit olunmuş öhdəliklərin həyata keçirilməsi üzrə konkret addımların müəyyən edilməsi üçün əsas olmalıdır.
“Bu görüşlər iyul ayında BMT Baş Assambleyasında Yeni Şəhər İnkişafı Proqramının icrası ilə bağlı Afrikanın vahid mövqeyinin formalaşdırılmasında mühüm mərhələdir”, –Tesoriere əlavə edib.
Paraqraf.com
