Azərbaycan və Çin arasında ikili diplom proqramları müzakirə olunub

Elm və təhsil naziri Emin Əmrullayev Azərbaycanda səfərdə olan Pekin Kimya Texnologiya Universitetinin (PKTU) rektoru Tan Tianvei ilə iki ölkə arasında təhsil sahəsində əməkdaşlığı müzakirə edib.

Bu barədə Paraqraf.com-a Elm və Təhsil Nazirliyindən məlumat verilib.

Bildirilib ki, görüşdə elm və ali təhsil, o cümlədən elmi-tədqiqat sahəsində PKTU ilə inkişaf istiqamətləri müzakirə edilib.

Həmçinin, Bakı Mühəndislik Universiteti (BMU) ilə PKTU arasında 6 ixtisas üzrə həyata keçirilən ikili diplom proqramları ətrafında fikir mübadiləsi aparılıb, sözügedən əməkdaşlığın yeni ixtisaslar və sahələr üzrə genişləndirilməsi perspektivləri vurğulanıb.

Eyni zamanda BMU-da PKTU ilə birgə yeni yaradılmış “PKTU–BMU Mühəndislik fakültəsi”nin iki ölkə arasında təhsil əlaqələrinin inkişaf etdirilməsi baxımından xüsusi əhəmiyyət kəsb etdiyi qeyd edilib.

Daha sonra Bakı Dövlət Universiteti (BDU) və PKTU arasında “Kimya” ixtisası üzrə bakalavriat səviyyəsində ikili diplom proqramına dair müqavilə imzalanıb. Sənədi BDU-nun rektoru Elçin Babayev və PKTU-nun prezidenti Tan Tianvei imzalayıblar.

 

Paraqraf.com