Yazıçı Şərif Ağayar sosial şəbəkədə paylaşdığı statusda Azərbaycan musiqi ənənəsi, muğam və xalqın sevimli sənətkarları ilə yanaşı, dünya şöhrətli müğənni Rəşid Behbudovun sənətini də tənqid edib. Onun bu fikirləri qısa müddətdə geniş müzakirələrə səbəb olub və ictimaiyyət tərəfindən birmənalı qarşılanmayıb.
Şərif Ağayarın səsləndirdiyi fikirlərə tanınmış müğənni Şahin İsmayılov cavab verib. O Paraqraf.com-a açıqlamasında bildirib ki, Şərif Ağayar, muğam, Azərbaycan musiqi ənənəsi və xüsusilə də Rəşid Behbudov kimi dahi sənətkar haqqında səsləndirdiyin fikirlər təkcə fərdi rəy deyil, milli-mədəni yaddaşa hörmətsizlikdir:
“Sovet imperiyası dövründə dünyanın bütün ölkələrində verdiyi konsertlərdə ilk və son ifası “Azərbaycanım” mahnısı olan, Vətənini, xalqını canından çox sevən Azərbaycanı bütün dünyaya tanıtdıran, Azərbaycan müğənnilik sənətinin ən yüksək zirvəsi olan, özündən sonra böyük məktəb qoyub gedən, doğma Qarabağımıza görə, o vaxtlar SSRİ rəhbəri olan Qorbaçovla kəskin danışığına görə şəhid edilən, bal səsli Rəşid Behbudov kimi dahi sənətkarımızın adından istifadə edib, gündəmə gəlmək istəyən, Azərbaycanda heç kimin tanımadığı, yazıçı olmaq istəyən Şərif Ağayar adlı birisinə demək istəyirəm ki, üzündəki maskanı cırıb güzgüdə özünə yaxşı bax gör, Rəşid Behbudov kimi dahi sənətkar haqqında kim sənə haqq verib ki, onun sənəti barədə belə mənfi fikirlər səsləndirəsən? Səndən fərqli olaraq bütün dünya Rəşid Behbudovu sevir. Məncə, belə şəxsləri bütün tanınmış mədəniyyət və incəsənət xadimləri, ictimaiyyət arasında tanınmış insanlar qınaq obyektinə cevirib, hər kəs öz mövqeyini bildirməlidir ki, gələcəkdə hər yerindən duran belə dahi sənətkarlarımız haqqında danışanda yerini bilsinlər”.
Həsən
Paraqraf.com
