Medianın İnkişafı Agentliyinin (MEDİA) yaradılmasından 5 il ötür. Prezident İlham Əliyevin “Azərbaycan Respublikasında media sahəsində islahatların dərinləşdirilməsi haqqında” 2021-ci il 12 yanvar tarixli, 1249 nömrəli Fərmanı ilə yaradılan bu qurum ötən müddət ərzində mühüm inkişaf yolu keçib.
Beş il ərzində görülən işlər təkcə medianın inkişafına deyil, eyni zamanda cəmiyyətin informasiya mühitinin sağlamlaşdırılmasına və ictimai inkişafına mühüm töhfə verib. Qısa müddət ərzində medianın modernləşdirilməsi, peşəkarlıq səviyyəsinin yüksəldilməsi və şəffaflığın təmin olunması istiqamətində əhəmiyyətli nəticələr əldə olunub.
Bu illər ərzində media subyektlərinin reyestrinin yaradılmasından jurnalistlərin reyestrinə qədər genişmiqyaslı işlər görülüb. Medianın inkişafının dəstəklənməsi, sahə jurnalistikasının gücləndirilməsi, jurnalistlərin peşəkarlığının artırılması, yeni informasiya-kommunikasiya texnologiyalarının və innovasiyaların tətbiqinin təşviqi istiqamətində çoxsaylı layihələr həyata keçirilib.
Həyata keçirilən islahatlar və layihələr nəticəsində Azərbaycan mediasının peşəkarlıq səviyyəsi yüksəlib, ölkə mediası yerli və beynəlxalq arenada etibarlı və peşəkar informasiya mənbələrindən birinə çevrilib.
Medianın İnkişafı Agentliyinin 5 illik yubileyi münasibətilə media ictimaiyyəti qurumu təbrik edir, gələcək fəaliyyətində yeni uğurlar arzulayır.
MEDİA-nın 5 illik yubileyi mübarək!
Paraqraf.com
