ŞƏT sədrliyi 4-cü dəfə Qırğızıstana keçir
2026-cı ildə dördüncü dəfə Şanxay Əməkdaşlıq Təşkilatına (ŞƏT) sədrlik edəcək Qırğızıstan təşkilatın maliyyə mexanizmlərini fəal şəkildə inkişaf etdirməyi və infrastrukturunun yaxşılaşdırılmasına töhfə verməyi planlaşdırır.
Paraqraf.com-un məlumatına görə, bunu Qırğızıstan Prezidenti Sadır Japarov ölkəsinin ŞƏT-ə sədrliyinə keçidini şərh edərkən deyib.
Qırğızıstanın sədrliyi “ŞƏT-in 25 ili: Davamlı sülh, inkişaf və rifah naminə birlikdə” şüarı altında keçiriləcək.
“İqtisadi əməkdaşlıq potensialının reallaşdırılması prioritet olacaq. Bu kontekstdə Qırğızıstan təşkilat üçün effektiv maliyyə mexanizminin yaradılmasının sürətləndirilməsini, o cümlədən regional iqtisadi inteqrasiyanın asanlaşdırılması üçün ŞƏT-in İnkişaf Bankının, İnkişaf Fondunun və İnvestisiya Fondunun yaradılmasını təklif edir”, – deyə Japarov bildirib. Bundan əlavə, ölkə diqqəti nəqliyyat, logistika və infrastruktur məsələlərinə yönəltmək niyyətindədir.
Prezident qeyd edib ki, Qırğızıstan beynəlxalq avtomobil və dəmir yolu daşımaları üçün əlverişli şəraitin yaradılması, o cümlədən yeni nəqliyyat marşrutlarının yaradılması və ŞƏT-ə üzv dövlətlərin tranzit-nəqliyyat potensialından səmərəli istifadə edilməsi üçün çoxtərəfli əməkdaşlığın inkişaf etdirilməsi təklifini verəcək.
Paraqraf.com
