Bu gün ədəbiyyatsevərlər üçün xüsusi bir gün oldu – yazıçı Natiq Məmmədlinin yeni kitabının təqdimatı baş tutdu. Tədbir “Sev” mövzusunun yaratdığı pozitiv ovqatla yadda qaldı və “Bir Sevincli gün yaşadıq!” devizi ilə gerçəkləşdi.
Təqdimat mərasimində tanınmış qələm sahibləri və media nümayəndələri iştirak ediblər. Mərasimə Azərbaycan Yazıçılar Birliyinin katibi Rəşad Məcid, Azərbaycan Jurnalistlər Birliyinin sədr müavini, yazıçı-publisist Elçin Mirzəbəyli, həmçinin Paraqraf.com xəbər portalının təsisçisi Türkanə Səfərova qatılıb.
Tədbirdə çıxış edənlər Natiq Məmmədlinin yaradıcılığının müasir ədəbiyyata verdiyi töhfələrdən, əsərlərinin oxucu ilə qurduğu səmimi əlaqədən və yeni kitabda təqdim olunan ideyaların gənclərə, eləcə də bütün oxuculara təsirindən bəhs ediblər.
Müəllif tədbirə qatılan hər kəsə təşəkkür edərək bildirib:
“Bu gün sevincimi mənimlə bölüşən bütün dostlara, oxuculara və yaradıcı insanlara dərin təşəkkürümü bildirirəm. Hər biriniz bu günü mənim üçün daha qiymətli etdiniz”.
Sonda iştirakçılar arasında kitab imzalanıb, yaradıcılıq və ədəbiyyat müzakirələri aparılıb və xoş anlarla dolu bir gün yaşanıb.
