Son illər bəzi televiziya kanallarında yayımlanan verilişlər cəmiyyət tərəfindən birmənalı qarşılanmır. Efirə çıxan bəzi müğənnilər də efirə uyğun olmayan geyimlərlə diqqət çəkir. Bu verilişlər nə maarifləndirici, nə əyləndirici, nə də məlumatverici xarakter daşıyır və bir növ jurnalistikanın əsas funksiyalarına ziddir. Əslində, televiziya ictimaiyyəti maarifləndirməli, insanlara bilik və informasiya ötürməlidir. Lakin hazırda təqdim olunan verilişlər daha çox şəxsi həyatların müzakirəsi, küsülülük və ailə problemlərinin efirə daşınması ilə yadda qalır. Bu tendensiya hələ də davam edir və xüsusilə nəzərə almaq lazımdır ki, bu tip verilişlərə uşaqlar da baxır. Bu isə onların psixologiyasına və dünyagörüşünə mənfi təsir göstərə bilər.
Media eksperti Hacıbəy Heydərli “Paraqraf.com”a açıqlamasında bildirib ki, Azərbaycan televiziyalarında yayımlanan bayağı verilişlər artıq tamaşaçıları yorur:
“Televiziya kanalları bayağı verilişlərdən, süni qalmaqallardan, saxtakarlıqdan hələ də uzaqlaşa bilmirlər. Bu isə medianın əsas maarifləndirmə funksiyasının televiziya kanallarından demək olar ki, silinməsi deməkdir. Maarifləndirici verilişlərin, mədəniyyət və sənətkarları təbliğ edən proqramların sayı çox azdır. Əvəzində şou tipli verilişlər və ucuz qalmaqallar önə çıxır. Reytinq cədvəllərində də məhz həmin verilişlər birinci yerdə qərarlaşır”.
Ekspert qeyd edib ki, televiziya kanalları özəl struktur olduğundan fəaliyyətlərini özləri tənzimləyir:
“Bu səbəbdən də bu tip verilişləri ön plana çıxarırlar. Əgər maarifləndirici, mədəniyyət yönümlü verilişlərin sayı artsa, növbəti mərhələdə məhz mədəniyyəti təbliğ edən proqramların da yüksək reytinq qazandığının şahidi ola bilərik”.
Hacıbəy Heydərli əlavə edib ki, Audiovizual Şura da mövcud vəziyyətlə bağlı müəyyən tövsiyələr verir:
“Lakin efirdə açıq qanun pozuntusu olmadığı halda, Audiovizual Şuranın televiziya kanallarına müdaxilə imkanları məhduddur. Azərbaycan cəmiyyəti mövqe ortaya qoymalıdır ki, bayağı verilişlər aradan qalxsın. Belə olduğu təqdirdə, maarifləndirici verilişlər ön plana çıxacaq”.
Kəmalə Vəliyeva
Paraqraf.com
