Kənd yerlərində çalışan müəllimlər təhsilin ən önəmli dayaqlarından biri olsalar da, onların gündəlik həyatı şəhər məktəblərindəki həmkarlarından daha mürəkkəb və çətin olur.
Mövzu ilə bağlı təhsil eksperti Elşən Qafarov paraqraf.com-a açıqlamasında bildirib ki, kənd məktəblərində çalışan müəllimlər hal-hazırda ciddi problemlərlə üzləşirlər:
“Bu problemlərin birincisi odur ki, urbanizasiya nəticəsində insanların kütləvi şəkildə şəhərlərə axışması, uşaq sayının məktəblərdə, xüsusilə də kənd məktəblərində azalmasına, sinif sayının azalmasına gətirib çıxardır. Kənd məktəblərində müəllimlərin ən böyük problemi məhz dərs saatlarının azlığıdır”.
Ekspert bu mövzu ilə bağlı digər səbəbidə qeyd edib:
“Repititorluq şəhər məktəblərində nisbətən çox olsa da, kənd yerlərində demək olar ki, minimum səviyyədədir. Eyni zamanda qiymətlər də aşağıdır. Məsələn Bakı şəhərində qiymətlər 100-200, bəzən 300 manata qədər yüksəlirsə, kənd yerlərində bu ən yaxşı halda 30 manat, əksər hallarda isə 20 manat civarındadır”.
O həmçinin qeyd edib ki, müəllimlərin sosial müdafiəsi də çox zəifdir:
“Nəzərə alsaq ki, bir çox ölkələrdə kənd müəllimləri üçün əlavə sosial tədbirlər görülür, bizdə isə bu tədbirlər yoxdur. Ümumiyyətlə, Azərbaycanda pedaqoji fəaliyyətlə məşğul olam şəxslərin sosial müdafiəsi haqqında ayrıca qanuna böyük ehtiyac var”.
Elşən Qaforovun fikrincə, yaranmış vəziyyəti aradan qaldırmağın yeganə yolu, “Müəllimlərin Sosial Müdafiəsi haqqında” Azərbaycan Respublikasının qanununun qəbul edilməsidir.
Cəfərova Validə
Paraqraf.com
