19 noyabr 2025-ci il tarixində Tərtər rayon Heydər Əliyev Mərkəzində Azərbaycan Yazıçılar Birliyinin (AYB) və Azərbaycan Jurnalistlər Birliyinin (AJB) üzvü Raziyə Kamilqızının təşkilatçılığı ilə mənalı bir görüş keçirildi.
Tədbirdə Tərtər Rayon İcra Hakimiyyətinin Vətən müharibəsi iştirakçıları və şəhid ailələri üzrə işin təşkili şöbəsinin müdiri Ülvi Nəcəfov iştirakçıları salamlayaraq Tərtər Rayon İcra başçısı Müstəqim Məmmədovun səmimi ürək sözlərini çatdırdı. O, igid şəhidlərimizin əziz xatirəsinin hər zaman ehtiramla yad olunduğunu vurğuladı.
Daha sonra Heydər Əliyev Mərkəzinin direktoru Səlimə Yusibova tədbir iştirakçılarına minnətdarlığını bildirib, onları Zəfər bayramı münasibətilə təbrik etdi. Tərtər Olimpiya Mərkəzinin “Savat” idman növü üzrə baş məşqçisi və “Əlbəyaxa döyüş” üzrə Aran bölgəsinin rəhbəri Ruhi Hüseynov isə qəhrəman oğullarımızla qürur duyduğunu xüsusi qeyd etdi.
Şəhidlər İlqar Əhmədovun və Ramil Rəhimovun anası, vətənpərvər Leyla Əhmədova göstərilən diqqət və qayğıya görə İcra başçısına, rayon ictimaiyyətinin nümayəndələrinə, Heydər Əliyev Mərkəzinin rəhbərliyinə və bütün kollektivə dərin minnətdarlığını bildirdi.
Görüşün sonunda Raziyə Kamilqızının kitabları və şəhid İlqar Əhmədovun çəkdiyi rəsmlər Heydər Əliyev Mərkəzinə təqdim olundu. Tədbir xatirə şəkillərinin çəkilməsi ilə yekunlaşdı.
Türkan Səfərova
Paraqraf.com
