Məşhur iş adamının bahalı avtomobillərinə həbs qoyuldu

Bakıda tüninq xidməti göstərən məşhur “AZART” şirkətinin rəhbəri Arif Zeynalovun bahalı avtomobillərinə həbs qoyulub.

Paraqraf.com “Qaynarinfo”ya istinadla xəbər verir ki, iş adamının həbs qoyulan avtomobilləri “Li”, “Chrysler” və BMW markalı nəqliyyat vasitələridir.

Arif Zeynalovun banklardan birinə 2023-cü il tarixli kredit müqaviləsi üzrə 76 500 manat əsas, 3 825 manat cərimə borcu və ödənilməmiş 342.45 manat dövlət rüsumu borcu var. Həmin ildən kredit borcunu ödəməyən iş adamının avtomobillərinə Səbail Rayon İcra Şöbəsi tərəfindən həbs qoyulub.

Arif Zeynalov özü də məhkəməyə müraciət edib. Bildirib ki, həbs qoyulan avtomobillərin ümumi dəyəri kredit müqaviləsi üzrə ondan tutulmalı olan pul məbləğindən dəfələrlə çoxdur. O, nəqliyyat vasitələri üzərinə qoyulmuş həbsin ləğv olunmasını xahiş edib. Bildirib ki, 80 000 manata yaxın borcu var, borcunu hissə-hissə ödəməklə bağlı icra məmuru ilə danışacaq. Həmçinin qeyd edib ki, “Li L8 Pro Plug-in” avtomobili kreditdədir, qiyməti 100 000 manatdan çoxdur, maşına görə ödənilməyən 50 000 manat bank borcu var. BMW-ni atası, “Chrysler” markalı maşını isə özü idarə edir. Ona görə də yalnız “Chrysler” markalı avtomobilin üzərinə həbs qoyulmasını istəyib. Yerdə qalan borcunu da hissə-hissə ödəmək niyyətində olduğunu bildirib.

Məhkəmə “Li L8 Pro Plug-in” markalı nəqliyyat vasitəsinin üzərinə qoyulan həbsi saxlayıb. İş adamının təqdimatının qalan hissəsi təmin edilməyib.

Qeyd edək ki, Arif Zeynalov “AZART Group”un təsisçisi və baş direktorudur.

Məsələ ilə bağlı iş adamının özü ilə də əlaqə saxlamaq mümkün olmayıb, telefon zəngləri cavabsız qalıb.

 

Paraqraf.com