Azərbaycanın azadlığı və xalqımızın şərəfi uğrunda canından keçən şəhidlərimizin hər biri tariximizin ölməz səhifələrini yazıb. Onların sırasında Xocalı uğrunda döyüşlərdə qəhrəmancasına şəhid olan Mübariz Ağahüseyn oğlu Şahmurovun adı da xüsusi ehtiramla çəkilir. 33 il boyunca itkin sayılan bu igid qəhrəmanın nəşi 2025-ci ildə tapılaraq doğma vətən torpağına qovuşdurulub.
Unudulmayan qəhrəman
Xocalı faciəsi zamanı minlərlə insan kimi Mübariz Şahmurov da xalqı və torpağı uğrunda son damla qanına qədər döyüşüb. O, həyatını vətənin azadlığına fəda edənlərdən biri idi. Uzun illər boyu onun taleyi naməlum qalmış, ailəsi və yaxınları bir ümidlə xəbər gözləmişdilər. Amma 33 il sonra o ümidlər reallığa çevrildi – şəhidin nəşi tapıldı və dövlət səviyyəsində dəfn olunmasına qərar verildi.
Vətənə dönüş – 33 ildən sonra
Rəsmi məlumata əsasən, Mübariz Şahmurovun nəşi 28 oktyabr 2025-ci il tarixində rəsmi mərasimlə dəfn ediləcək. Səhər saat 10:30-da onun nəşi Atatürk prospekti 37 ünvanına gətiriləcək, oradan isə böyük izdihamla Şəhidlər Xiyabanına yola salınacaq.
Dəfn mərasimindən sonra isə Atatürk prospekti 33 ünvanında yerləşən Xeyir-Şər evində saat 13:00-dan etibarən dövlət tərəfindən ehsan süfrəsi təşkil olunacaq.
Bu, təkcə bir ailənin deyil, bütün Azərbaycanın yas və qürur günüdür. Çünki hər bir şəhidin ruhu bu torpaqda yaşayan hər bir azərbaycanlının qəlbində yaşayır.
Əbədiyyətə qovuşan ad
Şəhid Mübariz Şahmurovun qəhrəmanlığı və vətənə sədaqəti barədə illər əvvəl filmlər, sənədli layihələr hazırlanıb. Onun igidliyi haqqında danışanlar arasında tanınmış ziyalılarımız da olub. Bu gün isə o, nəinki ailəsinin, həm də bütün xalqın fəxr etdiyi simalardan birinə çevrilib.
Qəhrəmanlıq hekayəsi ekranda
Şəhid Mübariz Şahmurovun həyat yolunu və döyüş qəhrəmanlığını əks etdirən sənədli film “Paraqraf.com”un təsisçisi Türkanə Səfərova tərəfindən, Suraxanı Rayon İcra Hakimiyyətinin başçısı Adil Əliyevin məsləhəti ilə çəkilib.
Filmdə şəhidin ailə üzvləri, döyüş yoldaşları və onu tanıyan insanların xatirələri toplanıb, Mübariz Şahmurovun şəxsiyyətində bir azərbaycanlı igidinin mənəvi portreti yaradılıb. Bu ekran işi həm bir övladın atasına borcu, həm də bir jurnalistin xalqına sevgisinin təcəssümüdür.
Mübariz Şahmurovun 33 il sonra tapılan nəşi, şəhidlərimizin unutulmadığının, hər bir qəhrəmanın ruhunun bu xalqın hafizəsində yaşadığının simvoludur. Onun həyatı və şəhadəti bir daha göstərir ki, zaman keçsə də, vətən yolunda gedənlərin izi heç vaxt itməz.
Allah bütün şəhidlərimizə rəhmət eləsin!
Ruhları şad, məkanları cənnət olsun.
Həsən
Paraqraf.com
