Spirtli içkilərin satışına QADAĞA

Polşanın Lodz şəhərində gecə saatlarında alkoqol satışı qadağan edilib.

Paraqraf.com xəbər verir ki, Polşanın dövlət yayımçısı “TVP World”-un xəbərinə görə, Lodz şəhərinin mərkəzi də daxil olmaqla yeddi məhəllədə 17 oktyabr tarixindən etibarən saat 22:00-dan 06:00-a qədər mağazalarda və yanacaqdoldurma məntəqələrində spirtli içkilərin satışı qadağan olunacaq.

Bu addım, Krakow, Vroklav, Poznan və Gdansk kimi böyük şəhərlərin də daxil olduğu Polşa üzrə 180 bələdiyyədə tətbiq olunan oxşar qadağalardan sonra atılıb.

Qadağanın səbəbləri arasında ictimai təhlükəsizliyin və nizam-intizamın artırılması, ətraf mühitin təmizliyinin yaxşılaşdırılması və səs-küy səviyyəsinin azaldılması göstərilir.

Qeyd edək ki, bar və restoranlar bu qadağadan təsirlənməyəcək.

Qadağaya əməl etməyən müəssisələr 30 min zlotiyə (təxminən 7 min avro) qədər cərimə və alkoqol satış lisenziyasının ləğvi ilə üzləşə bilərlər.

Digər tərəfdən, Polşanın paytaxtı Varşavada da gecə saatlarında alkoqol satışını məhdudlaşdırmaq məqsədilə ötən ay pilot proqram başladılıb.