Son aylarda ABŞ ilə Ukrayna arasındakı münasibətlərdə diqqətçəkən dəyişikliklər müşahidə olunur. Ukrayna Prezidenti Volodimir Zelenskinin ABŞ Prezidenti Donald Trampın Ukraynaya “Tomahawk” raketləri göndərəcəyi və Rusiya ilə atəşkəsin əldə olunmasına yardım göstərəcəyi təqdirdə onu Nobel Sülh Mükafatına təqdim etmək niyyəti, iki ölkə arasında diplomatik dinamikanın yeni fazaya keçdiyini göstərir. Lakin ekspertlərə görə, Vaşinqtonun hazırkı siyasəti əvvəlki kimi Ukraynanın ərazi bütövlüyünü prioritet saymır.
Mövzu ilə bağlı Ədalət, Hüquq, Demokratiya (ƏHD) Partiyası İdarə Heyətinin üzvü, siyasi şərhçi Əli Zülfüqaroğlu Paraqraf.com-a açıqlamasında bildirib ki, hazırda Ukrayna məsələsində prioritetlər dəyişib:
“Müharibə başlayandan bəri bir çox istiqamətlərdə ciddi dəyişikliklər baş verib. ABŞ-də hökumət dəyişikliyi ilə yanaşı, Vaşinqtonun Ukrayna siyasətinə baxışı da fərqli olub. Tramp üçün əsas məsələ Ukraynanın ərazi bütövlüyü deyil, bu savaşdan necə faydalanmaqdır. Hazırda ABŞ Ukrayna müharibəsindən Avropa İttifaqına təzyiq vasitəsi kimi istifadə edir”.
Siyasi şərhçinin sözlərinə görə, faydalı qazıntılarla bağlı imzalanmış sazişlərdən sonra ABŞ öz maraqlarının bir hissəsini təmin edib:
“İndi Vaşinqton üçün əsas hədəf Avropa İttifaqının ABŞ-nin iqtisadi və siyasi təsiri altında qalmasını təmin etməkdir. Aİ son dövrlər müstəqil siyasət yürütməyə, ABŞ maraqlarından kənar qərarlar verməyə çalışır. Bu isə Vaşinqtonu ciddi şəkildə narahat edir”.
Əli Zülfüqaroğlu hesab edir ki, Rusiyanın Ukrayna ilə yanaşı, Polşa və Estoniyaya da hücum etməsi ABŞ-nin maraqlarına uyğun gəlir:
“Avropa İttifaqı özünü təhlükəsiz hiss etdikcə, müstəqil siyasət yürütmək cəhdləri artır. Buna görə də ABŞ üçün Avropada gərginliyin saxlanması faydalıdır. Bu mənada Rusiya və ABŞ arasında Ukrayna məsələsində pərdəarxası razılaşmanın olması ehtimalı böyükdür. Əgər belə olmasaydı, Rusiya NATO ilə üz-üzə gəlməyə əsas verən addımlar atmaqdan çəkinərdi. Hazırda Moskvanın dəyənək rolu oynaması Vaşinqtonun maraqlarına tam cavab verir”.
Kəmalə Vəliyeva
Paraqraf.com
