Azərbaycan bazarı Pakistan əti dola bilər

Pakistan Ticarətin İnkişafı İdarəsi (TDAP) açıqlama verərək, ölkənin Azərbaycana ət ixracına rəsmi olaraq icazə aldığını bildirib.

Paraqraf.com açıqlamaya istinadən xəbər verir ki, bu qərar, Heyvanların Karantin Departamentinin Azərbaycanın baytarlıq və qida təhlükəsizliyi standartlarına tam uyğunluq əldə etməsindən sonra verilib.

Bu mühüm mərhələnin ardınca TDAP, ət ixracatçıları və aidiyyəti qurumlarla görüş keçirib. Görüşdə Azərbaycanın bazarına çıxış strategiyaları və ixrac imkanlarının genişləndirilməsi məsələləri müzakirə olunub.

Strategiyanın bir hissəsi kimi, TDAP 2025-ci ilin noyabr ayında Pakistanlı ət ixracatçılarından ibarət nümayəndə heyətini Azərbaycanın paytaxtı Bakıya göndərməyi planlaşdırır. Eyni zamanda, aparıcı Azərbaycanlı idxalçılar da Pakistanda keçiriləcək sərgiyə dəvət olunublar. Məqsəd iki ölkə arasında birbaşa ticarət və biznes əlaqələrini gücləndirməkdir.

TDAP rəsmisi Ather Hussain Khokhar bu nailiyyətin Pakistan ətinin yüksək keyfiyyətini və ölkənin etibarlı halal istehsalçısı kimi beynəlxalq nüfuzunu bir daha nümayiş etdirdiyini vurğulayıb.

 

Paraqraf.com