“Efirə gələndə “məni “sənətkar” kimi təqdim edin” deyə tapşırırlar”
“Bu gün sponsorlar internetdə məşhurlaşan, kompüter vasitəsi ilə səslərini dəyişənlər üçün konsertlər təşkil edirlər.
Bunun səbəbi informasiya axını, sosial şəbəkələr, yutub kanalıdır. Bu vasitələrlə dinləyicinin beynini, qulağını belə musiqi ilə doldururlar. Bununla da özlərinə qarşı tələb yaradırlar. Bu gün onu dinləyən 15-20 yaş arası dinləyici 10 il sonra bunu özünə töhmət edəcək. Özünə sual verəcək ki, bunu necə etmişəm? Özüm şahid olmuşam ki, vaxt gəlib həmin mahnıya qulaq asmağı özünə təhqir sayıb. İndi fərli mahnılar dinləyirlər. Gec olur, amma həmişə sənət qazanır. Müvəqqəti, bir neçə ay gündəmdə olan müğənnilər, musiqilər qazanmır. Onlar da teatr səhnəsinin dekorassiyaları kimi zaman-zaman dəyişirlər. Əsl sənətkar dəhnədir və hər zaman sevilir”.
Bu sözləri Əməkdar artist Gülüstan Əliyeva “Geriyə baxanda” verilişində deyib. Sənətçi istər televiyada, istərsə də məclislərdə rastlaşdığı mənfi hərəkətlərinə görə bəzi müğənniləri pisləyib:
“Bu gün təəssəf ki, səhnədə “kəmiyyətlər” var. Efirə gələndə məni “sənətkar” kimi təqdim edin, “filankəslə çıxım”, “məni bu cür təqdim et” deyə, tapşırırlar. Təəssüf ki, bu, telekanalarda böyük vüsət alıb. İçəri girəndə heç ayağa da durmaq istəmirlər. Çox təəssüflə qeyd etmək istəyirəm ki, el şənliklərində də bu hal yaşanır.
Bu yaxınlarda məclisə dəvət aldım. Müğənni və musiqiçilərə yer olmadığına görə məni başqa bir otağa dəvət etdilər. Digər müğənninin ansamblə da orada idi. Özü hələ gəlməmişdi. Basıb yemək yeyirdilər, yer olmadığına görə məni də ora apardılar. İnanın, içəri girdim, bilmirəm harada tərbiyə alıblar, evdə təlim-tərbiyə, böyük-kiçik yeri öyrədilməyib, belə tərbitəyəsizcəsinə heç kəs ayağa durmadı ki, bura kimsə daxil oldu.
Heç deyək sənətkar deyiləm, axı buraya bir müğənni, xanım daxil olub, bir ayağa durub, yer göstərək. Çox tərbiyəsiz şəkildə başlarını salıb yemək yeyirdilər. Kolidorda dayandım, amma oraya girmədim. Təəsüf edirəm ki, belə hallar var. Bilmirəm onları kim tərbiyə etməlidir. Təbii ki, evdən başlamalıdır hər şey. Belə hallar bu gün özünə müğənni deyən adamlarda da var. Onları təmizləmək və tərbiyə etmək lazımdır”.
