İran Hörmüz boğazındakı gəmilərə xəbərdarlıq edib.
Bu barədə “Reuters” məlumat yayıb.
Bildirilib ki, İran gəmilərə mesaj göndərərək “heç bir gəminin Hörmüz boğazından keçməsinə icazə verilmir” deyə xəbərdarlıq edib.
Mövzu ilə bağlı iqtisadçı-ekspert Razi Abbasbəyli “Paraqraf.com”a bildirib ki, Hörmüz boğazının bağlanması dünyada ciddi şəkildə neftin bahalaşmasına səbəb olacaq:
“Dünya neftinin 20%-dən çoxu bu boğaz vasitəsilə nəql olunur. Xüsusilə dünya bazarlarına Asiya ilə Avropanı birləşdirən əsas logistik strateji nöqtə hesab olunur. İran–İsrail–ABŞ arasında başlanan hərbi əməliyyatlar artıq dünya birjalarına öz təsirini göstərməyə başlayıb. Dünya bazarlarında 1 barelin qiyməti 10%-dən çox bahalaşıb. Bu bahalaşma davam edəcək. Faktiki qeyri-müəyyənlik vəziyyətində neftin qiymətinin artması və bunun davam edəcəyi gözləniləndir”.
Ekspert qeyd edib ki, baş verən proseslər qızılın da qiymətinə təsir edir:
“ABŞ Prezidenti Donald Tramp açıqlama verərək bildirib ki, İranda hərbi əməliyyatlar 4 həftə və ondan bir qədər çox davam edə bilər. Bu isə o deməkdir ki, mart ayında neftin qiymət artımı davam edəcək. Bu bahalaşma hər gün dəyişə bilər. Mart ayında neftin qiymətini 1 barel üzrə 100–110 dollar səviyyəsində müşahidə etmək mümkün ola bilər. Son 8 ayda neftin qiyməti 70–71 dollardan baha deyildi. Lakin bu gün birjalar açıldığı ilk dəqiqələrdən neftin qiyməti 81 dollardan yuxarı qalxmağa başladı”.
O əlavə edib ki, hərbi əməliyyatların davam etməsi və regiondakı gərginliyin qalması qiymət artımını şərtləndirir:
“Hərbi əməliyyatlar başa çatdıqdan və İranla ABŞ arasındakı münasibətlər nisbətən yoluna düşdükdən sonra qiymətlər yenidən əvvəlki səviyyəsinə qayıda bilər. Lakin yaxın 1–2 ay ərzində neftin ucuzlaşması deyil, təxminən 25–30% civarında bahalaşması gözlənilir”.
Kəmalə Vəliyeva
Paraqraf.com
