Aylar ötür, illər dəyişir, fəsillər bir-birini əvəzləyir. Lakin dəyişməz qalan bir həqiqət var – Vətən uğrunda canından keçən şəhidlərin müqəddəsliyi və əbədi ucalığı. Şəhidlik zirvəsi hər kəsə nəsib olmayan, yalnız yurd sevgisini ömründən üstün bilən igidlərin adını yazdırdığı ali mərtəbədir.
Bu çərçivədə Şəhid Ailələrinə Sosial Dəstək İctimai Birliyi (ŞASDİB) şəhid ailələri ilə bağlı fəaliyyətini davam etdirir. Birliyin sədri Almaz Zeynalova, Xəzər rayon təşkilatının rəhbəri Əliheydər müəllim və mətbuat xidmətinin rəhbəri Günay Atayeva Şabran rayonunun Dağ Bilici kəndində Birinci Qarabağ müharibəsi şəhidi Aslanov Təbəssüm Tofiq oğlunun ailəsini ziyarət ediblər.
Ziyarət Şabran rayon Şəhidlər xiyabanından başlanıb. Burada şəhidlərin ruhuna dualar oxunub, daha sonra Dağ Bilici kəndinə gələrək şəhid ailəsi ilə görüş keçirilib. Görüşün məqsədi şəhid ailələrinin problemləri ilə yaxından tanış olmaq, onların səsini cəmiyyətə çatdırmaq və qəhrəmanlarımızın xatirəsini yaşatmaq olub.
Söhbət zamanı şəhidin bacıları itkin düşən qardaşları haqqında danışaraq müharibənin ağır illərini xatırladıblar. Onlar o dövrdə əsgərlərin ayaqyalın, susuz və aclıq içində göstərdiyi fədakarlıqları, arxada qalan anaların və bacıların yaşadıqları iztirabları bölüşüblər. “Şəhidlər unudulur” deyə narahatlığını ifadə edən anaların səsi görüş iştirakçılarının qəlbinə toxunub.
ŞASDİB tərəfindən bildirilib ki, artıq 30 ildir şəhid ailələrinin yanında olmaq, onların problemlərinin həllinə dəstək göstərmək birliyin əsas məqsədlərindən biridir. Qurum bu missiyanı gələcəkdə də davam etdirməyi qarşısına məqsəd qoyur.
Səmimi mühitdə keçən görüş süfrə arxasında da davam edib. Şəhidin atası Tofiq müəllim oğlunun sağ qayıdacağına hələ də ümid bəslədiyini dilə gətirib.
Görüşün sonunda şəhidimizin anım günü münasibətilə 11-i tarixində Şabranda keçiriləcək tədbirə dəvət birliyin nümayəndələrinə çatdırılıb. QHT təmsilçiləri bu tədbirdə iştirak etməyi özlərinə borc bildiklərini, şəhidlərimizlə qürur duyduqlarını xüsusi vurğulayıblar.
Türkanə Səfərova
Paraqraf.com
