Müasir dövrdə qızların təhsili yalnız bir ailənin deyil, bütün cəmiyyətin inkişafına təsir göstərən əsas amillərdən biridir. Təhsil alan qızlar gələcəyin savadlı anaları, mütəxəssisləri və qərar verən şəxsləri kimi ölkənin sosial-iqtisadi inkişafında mühüm rol oynayırlar. Buna baxmayaraq, bəzi bölgələrdə hələ də köhnə yanaşmalar və stereotiplər səbəbindən qızların təhsildən yayınması halları müşahidə olunur. Valideynlərin yanlış inancları, sosial-iqtisadi çətinliklər və maarifləndirmə çatışmazlığı qızların məktəbdən uzaqlaşdırılmasına gətirib çıxarır. Bu isə təkcə qızların şəxsi inkişafına deyil, bütöv cəmiyyətin gələcəyinə ciddi maneə yaradır.
Ailə, Qadın və Uşaq Problemləri üzrə Komitənin mətbuat katibi Teymur Mərdanoğlu “Paraqraf.com”a açıqlamasında bildirib ki, qızların təhsil alması bu gün cəmiyyətimizin inkişafı üçün ən vacib məsələlərdən biridir:
“Bəzi valideynlər hələ də köhnə inanclarla yaşayaraq qız uşaqlarını orta məktəbdən belə uzaqlaşdırırlar. ‘Qız 9-cu sinifədək oxusa kifayətdir’ kimi düşüncələr qızlarımızın imkanlarını məhdudlaşdırır, onların gələcək həyatını, karyera və özünüifadə imkanlarını əlindən alır. Halbuki təhsilli qadın – güclü ailənin, sağlam cəmiyyətin və inkişaf edən dövlətin təməlidir”.
Teymur Mərdanoğlu qeyd edib ki, qızların təhsilinə mane olan səbəblər müxtəlifdir:
“Köhnəlmiş adət-ənənələr və erkən nikah düşüncəsi, gender stereotipləri, ailələrin sosial-iqtisadi çətinlikləri, valideynlərin maarifləndirmə çatışmazlığı, bəzi bölgələrdə məktəbə məsafənin uzaqlığı və təhlükəsizliklə bağlı narahatlıqlar bu problemləri daha da dərinləşdirir.
Bu maneələri aradan qaldırmaq üçün dövlət tərəfindən mühüm addımlar atılır. Erkən nikaha qarşı hüquqi mexanizmlər gücləndirilir, regionlarda geniş maarifləndirici tədbirlər həyata keçirilir, maddi imkanı məhdud olan ailələr üçün təhsilə dəstək proqramları genişləndirilir, qızların təhlükəsiz və davamlı şəkildə məktəbə davam etməsi üçün xüsusi mexanizmlər tətbiq olunur.
Bu istiqamətdə Ailə, Qadın və Uşaq Problemləri üzrə Dövlət Komitəsinin həyata keçirdiyi “Qızların Təhsilinə Dəstək” layihəsi xüsusi əhəmiyyət kəsb edir. Layihə çərçivəsində təhsildən yayınma riski olan qızlar müəyyən edilir, ailələrlə fərdi iş aparılır, sosial-pedaqoji və psixoloji dəstək göstərilir və həmin qızların təhsilə qaytarılması üçün ardıcıl tədbirlər görülür”.
O əlavə edib ki, qızların təhsildən uzaqlaşdırılması təkcə onların deyil, bütöv cəmiyyətin gələcəyinə zərbədir.
“Hər birimizin borcu bu stereotipləri aradan qaldırmaq, qız uşaqlarının təhsil hüququnu təmin etmək və onlara gələcəyin qapılarını açmaqdır. Təhsilli qız – güclü gələcək, güclü ailə və güclü Azərbaycan deməkdir”.
Kəmalə Vəliyeva
Paraqraf.com
