Mövzu ilə bağlı Azərbaycan Dillər Universitetinin Tərcümə fakültəsinin dekanı Bənövşə Məmmədova Paraqraf.com ilə söhbətləşdi. Müsahibimiz xarici dil öyrənməyin əhəmiyyətindən, gənclərin dil seçiminə təsir edən amillərdən, tərcüməçilik ixtisasının gələcəyindən və ana dilimizin qorunmasının vacibliyindən danışdı.

– Müasir dövrdə xarici dil bilmək nə dərəcədə zəruridir?

– Bu gün xarici dil bilmək artıq əlavə üstünlük deyil, demək olar ki, zərurətdir. Çünki dünya sürətlə dəyişir və ölkələr, insanlar arasında əlaqələr genişlənir. Təhsil almaq, işləmək, səyahət etmək, yeni məlumatlar əldə etmək üçün xarici dil biliyinə ehtiyacımız var. Xüsusilə ingilis dili beynəlxalq ünsiyyətin əsas vasitələrindən birinə çevrilib. Amma mən düşünürəm ki, insan yalnız bir dillə kifayətlənməməli, imkan daxilində başqa dilləri də öyrənməlidir.

– Xarici dillər insanın dünyagörüşünə və düşüncə tərzinə necə təsir göstərir?

– Hər bir dil özündə bir xalqın tarixini, mədəniyyətini və düşüncə tərzini daşıyır. Başqa dil öyrənəndə biz yalnız yeni sözlər öyrənmirik, eyni zamanda fərqli düşünməyi, hadisələrə başqa tərəfdən baxmağı da öyrənirik. Xarici dil insanın dünyagörüşünü genişləndirir, ünsiyyət bacarıqlarını artırır və fərqli mədəniyyətlərə hörmət hissini gücləndirir. Mən deyərdim ki, hər yeni dil insan üçün yeni bir pəncərə açır.

– Bu gün gənclər daha çox hansı xarici dilləri öyrənməyə üstünlük verməlidirlər?

– İlk növbədə, ingilis dilini qeyd edərdim. Çünki elm, texnologiya, beynəlxalq təhsil və biznes sahəsində bu dilin imkanları çox genişdir. Bununla yanaşı, alman, fransız, ispan, çin, ərəb və digər dillərə də maraq artır. Burada əsas məsələ yalnız hansı dilin daha populyar olması deyil, gəncin gələcək məqsədidir. Məsələn, texnologiya ilə maraqlanan gənclə diplomatiya və ya beynəlxalq münasibətlər sahəsində çalışan gəncin dil seçimi fərqli ola bilər. Mən gənclərə ən azı iki xarici dil öyrənməyi tövsiyə edərdim.

– Xarici sözlərin gündəlik danışığımızda artması Azərbaycan dilinə necə təsir edir?

– Bu, diqqət yetirməli olduğumuz məsələlərdən biridir. Xarici dillərdən sözlərin dilimizə daxil olması təbii prosesdir. Tarix boyu bütün dillər bir-birindən sözlər alıb. Ancaq problem o zaman yaranır ki, Azərbaycan dilində qarşılığı olan sözləri səbəbsiz yerə xarici sözlərlə əvəz edirik. Bəzən insanlar daha müasir görünmək üçün gündəlik danışıqda çoxlu xarici ifadələrdən istifadə edirlər. Mən hesab edirəm ki, xarici dil bilmək Azərbaycan dilində danışmaq bacarığımızı zəiflətməməlidir. Əksinə, dil biliklərimiz artdıqca ana dilimizə daha həssas yanaşmalıyıq.

– Xarici dil öyrənməklə ana dilimizi qorumaq arasında tarazlığı necə saxlamaq olar?

– Bunun üçün ilk növbədə ana dilimizdə düzgün danışmağa, oxumağa və yazmağa diqqət etməliyik. Azərbaycan dilində kitablar oxumaq, keyfiyyətli filmlərə baxmaq, dilimizin zəngin ifadə imkanlarından istifadə etmək vacibdir. Xarici dil öyrənmək ana dilimizi unutmaq demək deyil. Biz həm dünyaya açıq olmalı, həm də öz dilimizə, mədəniyyətimizə və milli kimliyimizə bağlı qalmalıyıq. Mənim üçün bu iki məsələ bir-birinə zidd deyil, əksinə, bir-birini tamamlayır.

– Süni intellekt və avtomatik tərcümə proqramları gələcəkdə peşəkar tərcüməçiləri əvəz edə bilərmi?

– Süni intellekt artıq tərcümə sahəsində ciddi dəyişikliklər yaradıb. Bu texnologiyalar mətnlərin tərcüməsini sürətləndirir və müəyyən işləri asanlaşdırır. Ancaq mən düşünmürəm ki, onlar peşəkar tərcüməçiləri tamamilə əvəz edə biləcəklər. Çünki tərcümə yalnız sözləri bir dildən digərinə çevirmək deyil. Burada məna, hiss, üslub, mədəniyyət və kontekst çox vacibdir. Xüsusilə bədii ədəbiyyatda, diplomatik görüşlərdə, hüquqi və siyasi mətnlərdə insan təcrübəsi və məsuliyyəti böyük əhəmiyyət daşıyır. Gələcəyin tərcüməçisi süni intellektlə rəqabət aparan deyil, ondan düzgün istifadə etməyi bacaran mütəxəssis olacaq.

– Xarici dil öyrənmək istəyənlər hansı üsullardan istifadə etməli və nələrə diqqət yetirməlidirlər?

– Ən vacib məsələ davamlılıqdır. Gündə bir saat oxuyub sonra uzun müddət fasilə verməkdənsə, hər gün 20-30 dəqiqə məşğul olmaq daha faydalıdır. Xarici dildə filmlərə baxmaq, musiqi dinləmək, kitab oxumaq və danışıq təcrübəsi qazanmaq lazımdır. Ən əsası isə səhv etməkdən qorxmamaqdır. Bəzən insanlar səhv danışmaqdan çəkindikləri üçün ünsiyyətdən qaçırlar. Halbuki dil məhz danışdıqca inkişaf edir. Mən gənclərə öyrəndikləri dili gündəlik həyatlarının bir hissəsinə çevirməyi tövsiyə edərdim.

– Tərcüməçilik ixtisasını seçən gəncləri gələcəkdə hansı imkanlar və çətinliklər gözləyir?

– Tərcüməçilik çox geniş imkanlar yaradan bir ixtisasdır. Məzunlarımız yalnız tərcüməçi kimi deyil, beynəlxalq şirkətlərdə, diplomatik qurumlarda, dövlət və özəl təşkilatlarda, turizm və media sahəsində də çalışa bilərlər. Eyni zamanda, şifahi və yazılı tərcümə, lokalizasiya, audiovizual tərcümə kimi müxtəlif istiqamətlər mövcuddur.

Əlbəttə, bu sahədə rəqabət də artır. Ona görə də gələcəyin tərcüməçisi yalnız xarici dili mükəmməl bilməklə kifayətlənməməli, ana dilində yüksək yazı və nitq bacarığına, geniş dünyagörüşünə, texnoloji biliklərə və sahə üzrə xüsusi hazırlığa malik olmalıdır. Biz universitetdə tələbələrə məhz bu bacarıqları qazandırmağa çalışırıq.

– Uşaqlara xarici dil öyrətməyə hansı yaşdan başlamaq daha məqsədəuyğundur?

– Uşaqların erkən yaşlarda dil öyrənmək qabiliyyəti daha yüksək olur. Ona görə də 3-6 yaş aralığında xarici dillə tanışlıq başlaya bilər. Amma bu, uşağı qrammatik qaydalarla yükləmək demək deyil. Bu yaşda mahnılar, oyunlar, şəkillər və gündəlik ünsiyyət vasitəsilə dil öyrətmək daha məqsədəuyğundur. Əsas odur ki, uşaq dili məcburiyyət kimi deyil, maraqlı bir fəaliyyət kimi qəbul etsin. Eyni zamanda, ana dilinin inkişafına da xüsusi diqqət yetirilməlidir.

– Sonda xarici dil öyrənmək istəyən gənclərə hansı tövsiyələri verərdiniz?

– Gənclərə ilk növbədə özlərinə inanmağı və məqsədlərindən vaz keçməməyi tövsiyə edərdim. Dil öyrənmək bir gündə nəticə verən proses deyil. Səbir, zəhmət və davamlı çalışma tələb edir. Öyrəndikləri dildən istifadə etməkdən çəkinməsinlər, xarici ölkələrdə təhsil və mübadilə proqramlarında iştirak etməyə çalışsınlar, fərqli mədəniyyətləri tanısınlar.

Bir məqamı da xüsusi vurğulamaq istəyirəm: xarici dil öyrənərkən öz ana dilimizi və milli kimliyimizi unutmayaq.

Bir neçə dil bilmək sizə dünyanı tanımaq imkanı verir, öz ana dilinizi dərindən bilmək isə kim olduğunuzu xatırladır. Hər ikisinə sahib olun!

Həsən
Paraqraf.com

The post Xarici dil bilmək dünyaya açılan qapıdır – Bənövşə Məmmədova ilə müsahibə appeared first on PARAQRAF.

Bəzən qəlbimizdə daşıdığımız sevgi onu layiqincə qiymətləndirməyi bacarmayan insanlara ünvanlanır. Həyatda hər zaman doğru insanı tapmaq asan olmur. Bəzən qarşımıza bizi xoşbəxt edən, bəzən isə məyusluğa uğradan insanlar çıxır. Bir insanın həqiqətən bizim üçün doğru seçim olub-olmadığını anlamağın ən yaxşı yollarından biri onunla zaman keçirmək, həyatın müxtəlif sınaqlarını birlikdə yaşamaqdır.

Sevginin gücü insanı bəzən qarşısındakı şəxsə görünməz tellərlə bağlayır. Arada qan bağı olmasa da, sanki can bağı yaranır. İnsan sevdiyi şəxsi həyatının ayrılmaz bir hissəsi hesab edir. Ondan ayrılmaq fikri belə bütün işıqların sönəcəyi, həyatın mənasını itirəcəyi qorxusunu yaradır. Elə bil nəfəsimiz daralır, ətrafımızdakı dünya öz rənglərini itirir. Bəs bu qədər dərin və güclü duyğu sevgi deyil, bəs nədir?

Mən həmişə müşahidə etmişəm ki, sevgi insanın dünyanı qavrama tərzini dəyişir. Məsələn, əvvəllər dinlədiyimiz, lakin xüsusi əhəmiyyət vermədiyimiz bir musiqi sevdiyimiz insanla birlikdə dinlədikdə ən gözəl melodiyaya çevrilə bilər. Onunla getdiyimiz bir məkan bizə dünyanın ən gözəl yeri, adi bir an isə ömrümüzün ən unudulmaz xatirəsi kimi görünər. Sanki həyatın bütün gözəllikləri həmin insanın varlığı ilə yeni məna qazanır. Bəzən bir sevgi insanın həyatında ən böyük dönüş nöqtəsinə çevrilir.

Ancaq sevginin yalnız gözəlliklərdən ibarət olmadığını da unutmamalıyıq. O, insanı xoşbəxt etdiyi qədər həssas və kövrək də edə bilər. Sevdiyimiz insana həddindən artıq bağlandıqda özümüzü, arzularımızı və fərdi dünyamızı arxa plana keçirə bilərik. Bu zaman sevgi ilə asılılıq arasındakı incə sərhəd itir.

Sevgi bəzən ürəyimizdə alovlanan bir oda bənzəyir. Bu od bizi isidir, ruhumuza həyat verir, lakin onun alovunda özümüzü itirmək təhlükəsi də var. Bəzən bütün həyatımızı bir insana görə çərçivəyə salır, qapılarımızı və pəncərələrimizi dünyaya bağlayırıq. Yalnız özümüzün və sevdiyimizin olduğu kiçik bir dünya yaradırıq. Zaman keçdikcə həmin dünya gözümüzdə bütün kainatdan böyük görünür.

Bəlkə də insan bu dünyanı özü yaradır və bir gün oradan ayrılmaq istəmir. Onun üçün bu dünya rəngarəng çiçəklərlə bəzənmiş bir laləzar bağına çevrilir. Həmin bağın toxumları isə insanın öz əlindədir. İstəsə, onları böyüdüb çiçəkləndirər, istəsə, gələcək üçün qoruyub saxlayar. Sevgi də belədir: ona necə yanaşmağımız, onu necə qorumağımız və hansı dəyərlər üzərində qurmağımız münasibətimizin gələcəyini müəyyənləşdirir.

Sevgi asılılıqdır, yoxsa mənəvi möcüzə?

Sevginin mahiyyəti əsrlər boyu insanları düşündürüb. Bu mövzuda saysız-hesabsız əsərlər yazılıb, müxtəlif fəlsəfi yanaşmalar irəli sürülüb. Leyli və Məcnunun qovuşmaz eşqi, Fərhad və Şirinin fədakarlığı, Əli və Ninonun hekayəsi məhəbbətin müxtəlif çalarlarını əks etdirən nümunələrdir.

Azərbaycan tarixində isə İlham və Fərizənin sevgisi xüsusi yer tutur. Onların bir-birinə bağlılığı, sədaqəti və taleləri ilə bağlı xatirələr saf məhəbbətin rəmzlərindən biri kimi yaddaşlarda yaşayır. Bu hekayə bizə sevginin yalnız xoşbəxt anlardan ibarət olmadığını, onun sədaqət, fədakarlıq və mənəvi bağlılıqla da ölçüldüyünü xatırladır.

Mənim fikrimcə, saf məhəbbət nə dəlilikdir, nə də insanın özünü tamamilə itirməsi. O, hər kəsin yaşaya biləcəyi, lakin mahiyyətini hər kəsin eyni dərinlikdə anlaya bilmədiyi incə bir duyğudur. Qəlbin ən sakit guşələrində yaranan, ruhu həm həyəcanlandıran, həm də düşündürən bir möcüzədir.

Belə möcüzələr həyatımızda hər zaman baş vermir. Bəlkə də elə buna görə bəzi sevgi hekayələri əsrlər boyu yaşayır, nəsillərdən-nəsillərə ötürülür və insanlara ilham verir.

Lakin sevgiyə başqa bir tərəfdən də baxmaq lazımdır: Yaşadığımız sevgi həqiqətdir, yoxsa özümüzün yaratdığımız bir xəyal?

Xəyal etdiyimiz insan, yoxsa sevdiyimiz insan?

Bəzən insan sevərkən ilahi sevgini insani duyğularla qarışdırır. Nağıllara inanaraq ağ atlı şahzadəsini gözləyən bir qız sevdiyi şəxsi bütün arzularını gerçəkləşdirəcək, heç vaxt səhv etməyəcək və onu daim xoşbəxt edəcək mükəmməl biri kimi təsəvvür edə bilər.

Ancaq zaman keçdikcə həmin insanın gözləntilərə uyğun olmadığını gördükdə məyusluq başlayır. Əvvəlki həyəcan azalır, arzular gerçəkliklə üzləşir və insan bəzən bütün ümidlərinin puça çıxdığını düşünür.

Halbuki bəzən yanılan sevgi deyil, insanın gözləntiləridir.

Sevmək qarşımızdakı insanı dəyişdirməyə çalışmaq, onu öz arzularımıza uyğunlaşdırmaq demək deyil. Əsl sevgi insanı olduğu kimi tanımaq, onun fərqli xüsusiyyətlərini anlamaq və qarşılıqlı hörmət çərçivəsində qəbul etməkdir. Qarşımızdakı insanın tamamilə başqa birinə çevrilməsini gözləmək sevginin deyil, şəxsi arzularımızı başqasının üzərində gerçəkləşdirmək istəyinin göstəricisidir.

Əlbəttə, sevmək hər davranışı qəbul etmək, öz dəyərlərimizdən imtina etmək və ya zərərli münasibətə dözmək demək də deyil. Sağlam məhəbbətin təməlində qarşılıqlı hörmət, anlayış, etibar və sərhədlərə riayət dayanır.

İnsan sevdiyi şəxsin yalnız gözəl tərəflərini deyil, zəif cəhətlərini də görməyi bacarmalıdır. Çünki heç kim qüsursuz deyil. Məhz fərqliliklərə baxmayaraq bir-birini anlamaq və münasibət üzərində birlikdə çalışmaq sevgini daha möhkəm edir.

Saf məhəbbətin əsl mənası

Məncə, saf məhəbbət insanın qarşısındakına yalnız öz xoşbəxtliyi naminə bağlanması deyil. Bu, sevdiyinin xoşbəxtliyini də düşünmək, onun arzularına hörmətlə yanaşmaq və münasibətdə hər iki tərəfin mənəvi inkişafına şərait yaratmaqdır.

Sevgi qarşılıq gözləmədən verilən duyğu kimi romantikləşdirilsə də, uzunmüddətli münasibətin sağlam qalması üçün qarşılıqlılıq vacibdir. Bir insanın daim verməsi, digərinin isə yalnız qəbul etməsi münasibəti zamanla yorucu edə bilər. Həqiqi məhəbbət hər iki tərəfin bir-birini dinlədiyi, anladığı və dəyər verdiyi münasibətdə özünü göstərir.

Bəzən sevmək azad buraxmağı bacarmaqdır. Sevdiyimiz insanın seçimlərinə hörmət etmək, onun fərdi dünyasını qorumaq və özümüzü də unutmamaq sevginin yetkinliyindən xəbər verir. Çünki sevgi insanı əsir etməməli, ona mənəvi güc verməlidir.

Həyatımızı yalnız bir insana bəslədiyimiz məhəbbət gözəlləşdirmir. Bəşəriyyətə duyduğumuz mərhəmət, insanlara göstərdiyimiz qayğı, saflıq, təmizlik və məsumluq da həyatımıza məna qatır. İnsan sevgini yalnız bir şəxsin qəlbində axtarmamalı, onu ailəsində, dostluqlarında, insanlara münasibətində və həyata baxışında da yaşatmağı bacarmalıdır.

Həyatı sevək, özümüzü sevək, insanları sevək. Eşqi isə onun qədrini bilən, onu qorumağı və yaşatmağı bacaran insanla bölüşək.

Çünki qadınlar çox zaman sevgini yaşadan, ailə daxilində qoruyan və gələcək nəsillərə ötürən mühüm mənəvi dayaqlardan biridir. Sevgi qadının qəlbində başlayaraq ailəyə, ailədən cəmiyyətə, cəmiyyətdən isə bütün bəşəriyyətə yayıla bilər.

Saf məhəbbət insanın özünü itirməsi deyil, sevdiyi ilə birlikdə daha gözəl bir insan olmağı bacarmasıdır. O, qəlbləri birləşdirən, həyata məna verən və zaman keçsə də, insanın ruhunda yaşamağa davam edən ən qiymətli duyğulardan biridir.

Nuridə Allahberdiyeva
İbtidai sinif müəllimi

The post Saf məhəbbət: Qəlbin sükutunda yaşayan möcüzə appeared first on PARAQRAF.

Sonda o həyəcanlı məqam çatdı və “Bir şəkil” sənədli filmi tamaşaçılara nümayiş olundu. Sənədli filmdə Xalq artisti Şamil Süleymanlı dərin təsirli nitqi ilə hadisələri gözlərimiz önündə canlandırdı, Nurəddin Mehdixanlı isə kadrarxası mətni səsləndirməklə izləyicilərin daxili aləmində vətənpərvərlik duyğularını oyatdı və filmə xüsusi rəng qatdı.

Hər kəs dərin sükut və böyük maraqla Xocalının mərd oğlu, 1944-cü il dekabrın 23-ündə dünyaya göz açan, geniş dünyagörüşünə və yüksək intellektə malik ziyalı Şöhrət Usub oğlu Həsənovun qəhrəmanlıq hekayəsini izləyirdi. Bir neçə xarici dili mükəmməl bilən, jurnalistika ilə fəal məşğul olan və Xocalının səsinin dünyaya çatdırılmasında əvəzsiz rolu olan “Xocalının səsi” qəzetinin adının seçilməsində belə yaxından iştirak edən Şöhrət Həsənov yalnız ziyalı deyil, həm də əsl Vətən fədaisi idi.

1992-ci il fevralın 25-dən 26-na keçən o dəhşətli gecədə erməni silahlı qüvvələri bəşər tarixinin ən qəddar soyqırımını törədərkən o, evində oturmadı, ön cərgədə dayandı. Son nəfəsinə, avtomatının darağındakı son gülləsinə qədər vuruşan Şöhrət Həsənov onlarla dinc sakinin, qadının, uşağın buzlu çayı keçərək xilas olmasına şərait yaratdı. Amma həmin gün onun həm də həyatla vidalaşdığı və əbədiyyətə qovuşduğu gün oldu. Faciədən təxminən bir ay sonra Şöhrət Həsənovun tapılan müqəddəs nəşi Bakıda Şəhidlər xiyabanında torpağa tapşırıldı. O, göstərdiyi misilsiz igidliyə görə Azərbaycan Respublikası Prezidentinin fərmanı ilə “İgidliyə görə” medalı ilə təltif edildi.

Onun ömür-gün yoldaşı Mehriban xanımla birlikdə Vətən sevgisi ilə böyütdüyü övladları — Aygün, Almaz, Gülnarə, Ruhiyyə və Bəyaz bu gün şəhid atalarının adını qürurla yaşadırlar. “Bir şəkil” filmi isə bu əbədi qəhrəmanlıq dastanını tarixin yaddaşına qızıl hərflərlə həkk edərək hər bir azərbaycanlının qəlbində heç zaman sönməyəcək bir məşəl yandırdı. Filmdə Şöhrət Həsənovla bağlı o qədər həssas məqamlara toxunulmuşdu ki, onu göz yaşları olmadan seyr etmək mümkün deyildi. Ən əsası, qızları atalarının arzularını gerçəkləşdirərək ali təhsil alıb Vətənə layiqli vətəndaş olmağı bacarıblar.

Ən nəhayət, 44 günlük müharibə zamanı torpaqlarımızın düşmən işğalından azad edilməsi şəhidlərimizin qanını yerdə qoymadı. Xocalı indi etibarlı əllərdədir, Xocalıda indi həyat var, azadlıq var, Xocalı üçün şəhid olanların ruhu şaddır. Bu qürurverici süjet xətti ilə sonlanan film həqiqətən də hər birimizin ruhunu oxşadı. Qeyd edək ki, bu film Xuraman Osmanovanın rəhbərliyi ilə şəhidlərimizə, eləcə də müharibə qəhrəmanlarımıza həsr olunan 4-cü layihəsidir.

Filmdən sonra çıxış edən layihənin rəhbəri Xuraman Osmanova qeyd etdi ki, Şöhrət Həsənov həm əsl Vətən fədaisi, həm də əsl müəllim idi. Belə ölməz qəhrəmanları yaşatmaq, tanıtmaq və unutmamaq lazımdır. Tədbirdə çıxış edən digər şəxslər də Şöhrət Həsənovun həyat yolundan, onun Vətənə olan sevgisindən və hər bir Azərbaycan vətəndaşı üçün örnək olacaq xarakterindən danışdılar. Qeyd olundu ki, belə sənədli filmlər şəhidlərimizin adının əbədiləşdirilməsində və gənclərdə milli ruhun tərbiyəsində mühüm rol oynayır.

Paraqraf.com

The post “Bir şəkil”, min fəryad: Xocalının əbədi ziyalısı və qürur ünvanı – Şöhrət Həsənov appeared first on PARAQRAF.

Bu gün dünyada mədəniyyətlərarası dialoq beynəlxalq təhlükəsizliyə, siyasi sabitliyə və xalqlar arasında etimadın formalaşmasına birbaşa təsir göstərir. Azərbaycanın ev sahibliyi etdiyi VII Ümumdünya Mədəniyyətlərarası Dialoq Forumu da məhz bu baxımdan mühüm platforma kimi çıxış edir.

Forumun 100-dən artıq ölkədən 500-dən çox qonağı, ümumilikdə isə 2000-dən artıq qeydiyyatdan keçmiş iştirakçını bir araya gətirməsi tədbirin beynəlxalq əhatəsini nümayiş etdirir. 2011-ci ildə Azərbaycanın təşəbbüsü ilə əsası qoyulan bu platformanın 15 il ərzində davamlı inkişafı mədəniyyətlərarası münasibətlərin müzakirəsinə olan ehtiyacın və beynəlxalq əməkdaşlığın əhəmiyyətinin göstəricisidir.

Prezident İlham Əliyevin çıxışında diqqət çəkən əsas məqamlardan biri Azərbaycanın coğrafi mövqeyi ilə yanaşı, tarixi və mədəni xüsusiyyətlərinin beynəlxalq dialoq üçün yaratdığı imkanlar idi. Avropa ilə Asiyanın qovşağında yerləşən Azərbaycan əsrlər boyu müxtəlif mədəniyyətlərin, dinlərin və ənənələrin qovuşduğu məkan olub. Bu tarixi təcrübə ölkəmizə fərqli mədəniyyətlər arasında qarşılıqlı anlaşmanın və dialoq mühitinin inkişafına töhfə vermək imkanı yaradıb.

Cənab Prezidentin çıxışında səsləndirdiyi “Hamımız milli ideyalar ətrafında birləşirik. Onlardan biri azərbaycançılıqdır” fikri milli kimliyin strateji əhəmiyyətini bir daha ön plana çıxardı.

Azərbaycançılıq ideologiyası müasir Azərbaycan dövlətçiliyinin əsas dayaqlarından, milli həmrəyliyimizi təmin edən mühüm mənəvi-siyasi amillərdən biridir. Ümummilli Lider Heydər Əliyevin əsasını qoyduğu bu ideologiya xalqımızın tarixi köklərini, milli-mənəvi dəyərlərini, dövlətçilik ənənələrini və müasir inkişaf hədəflərini vahid məfkurə ətrafında birləşdirir. Dövlət başçımızın da vurğuladığı kimi, Azərbaycan cəmiyyətinin milli ideologiya ətrafında sıx birliyi dövlətimizin güc mənbələrindən biridir.

Prezident İlham Əliyevin çıxışında mədəniyyətlərarası dialoqla beynəlxalq hüquq arasındakı əlaqəyə də xüsusi diqqət yetirildi. Azərbaycanın münaqişənin dinc yolla həlli üçün uzun müddət danışıqlarda iştirak etdiyi, nəticə əldə olunmadıqdan sonra isə özünümüdafiə hüququndan istifadə etdiyi bildirildi. Dövlət başçısı bu barədə deyib: “Biz özümüzü müdafiə etdik. Biz düşməni məğlub etdik. Biz ədaləti bərpa etdik”.

Prezidentin beynəlxalq təşkilatların qərarlarının icra mexanizmləri məsələsini ön plana çəkməsi də təsadüfi deyil. Rəsmi Bakı haqlı olaraq hesab edir ki, beynəlxalq hüquq yalnız prinsiplər və sənədlər səviyyəsində qalmamalı, real nəticələrlə müşayiət olunmalıdır.

Forumun mahiyyəti də göstərir ki, hüquqi və siyasi mübahisələrin davamlı həlli üçün dialoqun qorunması, qarşılıqlı anlaşmanın təşviqi və gələcək münaqişələrin qarşısının alınması eyni dərəcədə əhəmiyyətlidir. Başqa sözlə, dialoq sülhün möhkəmləndirilməsi və qarşılıqlı etimadın artırılması üçün əlavə imkanlar yaradır.

Forumda diqqət çəkən digər mühüm istiqamət Azərbaycanın müharibədən sonrakı mərhələdə sülhün qurulmasına dair yanaşması oldu. Prezident İlham Əliyev Azərbaycanın Ermənistanla sülh təşəbbüsünü irəli sürdüyünü vurğulayaraq müharibənin dayandırılmasının və gələcək qarşıdurmaların qarşısının alınmasının əhəmiyyətinə toxundu.

Dövlət başçımızın “Müharibəyə başlamaq çox asandır, onu bitirmək isə çox çətindir” tezisi münaqişələrə son qoymağın siyasi iradə, diplomatik səylər və uzunmüddətli sülh mexanizmləri tələb etdiyini bir daha təsdiqləyir.

Forumda Azərbaycanın beynəlxalq təşkilatlarla əlaqələri, müxtəlif dövlətlərlə strateji tərəfdaşlığı və regional bağlantıların inkişafında iştirakı da diqqət mərkəzində oldu. Çin və ABŞ kimi dünyanın iki aparıcı gücü ilə strateji tərəfdaşlıq sənədlərinin imzalanması, Avropa İttifaqına üzv dövlətlərlə münasibətlər, AQEM-də sədrlik və Azərbaycanın beynəlxalq tədbirlərə ev sahibliyi etməsi ölkəmizin çoxşaxəli xarici siyasətinin göstəricisidir.

Yeri gəlmişkən, forumda BMT-nin Sivilizasiyalar Alyansı, İslam Əməkdaşlıq Təşkilatı, ICESCO, UNESCO və digər beynəlxalq qurumların nümayəndələrinin çıxışlarında “Bakı Prosesi”nin strateji əhəmiyyəti də xüsusi vurğulandı.

Parçalanan dünyada körpülərin qurulmasının vacibliyinə diqqət çəkən forum iştirakçıları fərqli mədəniyyətlərə, dinlərə və siyasi baxışlara malik cəmiyyətlər arasında anlaşmanın qorunmasının davamlı səylər tələb etdiyini qeyd edirlər. Bu məqsədə nail olmaq üçün isə beynəlxalq əməkdaşlığın genişləndirilməsi və tərəfdaşlıq münasibətlərinin gücləndirilməsi mühüm əhəmiyyət daşıyır.

Nigar Məmmədova
Azərbaycan Respublikası Milli Məclisinin deputatı

The post Azərbaycançılıq ideologiyası milli kimliyimizin və dövlətçiliyimizin əsas dayaqlarındandır appeared first on PARAQRAF.

Saatlı Rayon İcra Hakimiyyətinin başçısı Elmir Bağırov bu gün gənc idmançını qəbul edib. Görüşdə Mil-Muğan Regional Gənclər və İdman İdarəsinin rəisi Elçin Qiyasov, aidiyyəti qurumların nümayəndələri və idmançının məşqçi-müəllimi iştirak ediblər.

İdmançının uğuru yüksək qiymətləndirilib

Görüş zamanı rayon icra hakimiyyətinin başçısı Elmir Bağırov Ağaş Yolçuzadəni qazandığı uğur münasibətilə təbrik edib, ona gələcək yarışlarda yeni nailiyyətlər arzulayıb.

Rayon rəhbəri çıxışında Azərbaycanda idmanın inkişafına, yeniyetmə və gənclərin idmana cəlb olunmasına, onların uğurlarının dəstəklənməsinə göstərilən dövlət diqqət və qayğısını vurğulayıb.

Mil-Muğan Regional Gənclər və İdman İdarəsinin rəisi Elçin Qiyasov da idmançını və onun məşqçi-müəllimini təbrik edərək qazanılan nəticənin əhəmiyyətini qeyd edib.

Fəxri fərman və hədiyyələr təqdim olunub

Görüşün sonunda Ağaş Yolçuzadəyə uğuruna görə Saatlı Rayon İcra Hakimiyyəti və Mil-Muğan Regional Gənclər və İdman İdarəsi tərəfindən fəxri fərman və hədiyyələr təqdim edilib.

The post Taekvondo üzrə ölkə birinciliyinin qalibi bu dəfə Saatlıdan oldu appeared first on PARAQRAF.

Paraqraf.com xəbər verir ki, bu barədə Oxu.Az-ın qaynar xəttinə müraciət daxil olub.

Sərnişinlərin sözlərinə görə, sözügedən marşrut xətti üzrə avtobuslar köhnə olduğu üçün tez-tez yolda nasazlıq halları baş verir. Bu vəziyyət avtobusların hərəkət intervalına da təsir göstərir.

Məsələ ilə bağlı Azərbaycan Yerüstü Nəqliyyat Agentliyindən (AYNA) sorğuya cavab olaraq məlumat verilib ki, 55 nömrəli marşrut xəttində avtobusların bir qismi yenilənib. Proses davam etdirilir.

“Marşrutun keçdiyi küçə və prospektlərdə müşahidə edilən nəqliyyat sıxlığı avtobuslararası intervalın pozulması ilə nəticələnə bilir. Buna baxmayaraq, daşıyıcıya marşrutun nizamlı fəaliyyətinin təmin edilməsi, avtobusların saz vəziyyətdə saxlanılması ilə bağlı tapşırıqlar verilib”, – deyə açıqlamada qeyd olunub.

The post Bu avtobuslar nə vaxt yenilənəcək? appeared first on PARAQRAF.

R.Əsgərova 2 nəfərə qarşı dələduzluq əməlində təqsirləndirilib.

Məlum olub ki, Ramidə Gədəbəyin Arısu kəndində 2 qadını aldadaraq müvafiq olaraq onların birindən 800, digərindən 700 manat alaraq ələ keçirib.

Zərərçəkmiş şəxslərdən Xalidə Əzizova (şərti ad soyadlı) ifadəsində bildirib: “Gədəbəyin Arısu kəndində yaşayıram. Kənddə olarkən sakinlərdən buraya Ramidə adlı falçının gəldiyini eşitdim. Qızımın ailəsində problemlər olduğu üçün Ramidəyə yaxınlaşdım, onlar haqqında danışdım. Ramidə isə qızıma “qurd yağı” çəkildiyini, bu səbəbdən də ailəsi ilə problemləri olduğunu, mənə bu işdə kömək göstərəcəyini və 800 manat pul alacağını dedi. Ramidəyə inanıb pulu hissə-hissə olmaqla ona verdim. Sonradan qızım ərindən boşandı, mən də aldadıldığımı başa düşüb şikayət etdim”.

Digər zərərçəkmiş şəxs Şəhla Behbudova isə falçıya övladının xəstəliyi ilə əlaqədar müraciət etdiyini deyib: “Gədəbəyin Düzyurd kəndində yaşayıram. Bir gün Tovuz rayon sakini Ramidə Əsgərovanın falçı kimi kəndimizə gəldiyini eşitdim, həmin gün ona yaxınlaşıb qızımın xəstə olduğunu, tibbi müalicənin fayda vermədiyini deyib kömək etməsini xahiş etdim. Ramidə qızımın şəklinə baxdı, onu 2 aya sağalda biləcəyini deyərək qarşılığında 700 manat pul istədi, mən də razılaşdım. Onunla birlikdə yaşadığım evə getdik, pulu verdim. Ramidə evin həyətindən düyünlü sap çıxarıb qızıma əməl olunduğunu bildirdi, sonra çıxıb getdi. Xeyli vaxt qızımın sağalmadığını görüb onun məni aldatdığını başa düşdüm”.

Təqsirləndirilən qadın isə ifadəsində bildirib ki, artıq falçılıqla məşğul olmur. O, zərərçəkmiş şəxslərə vurduğu zərəri tamamilə ödədiyini və barışıq əldə edildiyini bildirib.

Barışıq ərizələri məhkəməyə təqdim edilib.

Gədəbəy Rayon Məhkəməsi Cinayət Məcəlləsinin 75.1.1-ci maddəsinə əsasən Ramidənin cinayət məsuliyyətindən azad edilməsi və iş üzrə icraata xitam verilməsinə qərar verib./Qafqazinfo/

The post 800 manat alıb ər-arvadı barışdıracağını dedi – Boşandılar… appeared first on PARAQRAF.

Kastronu devirmək planı

Əməliyyatın arxasında ABŞ-ın Mərkəzi Kəşfiyyat İdarəsi (MKİ) dayanıb. İngiliscə CIA adlanan bu qurum xarici ölkələrdə kəşfiyyat məlumatları toplamaq və gizli əməliyyatlar həyata keçirməklə məşğul olub. MKİ-nin rəhbəri Allen Dalles Kubada hakimiyyətin dəyişdirilməsi planının əsas təşkilatçılarından biri kimi çıxış edib. O, 1954-cü ildə Qvatemalada hökumətin devrilməsinə gətirib çıxaran əməliyyatla da əlaqələndirilib.

1959-cu ildə Fidel Kastronun rəhbərlik etdiyi inqilabın qələbəsindən sonra Vaşinqton Kubada yeni hakimiyyətin möhkəmlənməsini öz maraqlarına təhlükə hesab etməyə başlayıb. 1960-cı ilin martında ABŞ prezidenti Duayt Eyzenhauer Kubada rejim dəyişikliyinə yönəlmiş gizli tədbirlər planını təsdiqləyib. Əməliyyat üçün təxminən 13 milyon dollar ayrılıb ki, bu məbləğ indiki pulla yüz milyon dollardan çoxdur.
Planın əsasını Kubanı tərk etmiş mühacirlərdən silahlı dəstə yaratmaq, onları xaricdə hazırlamaq və adaya çıxarmaq təşkil edib. MKİ bu qüvvələrin hücumunun ölkə daxilində Kastroya qarşı kütləvi üsyana səbəb olacağını düşünüb. Qvatemala və Nikaraquadakı bazalarda təlim keçən təxminən 1 500 nəfərlik 2506-cı briqada tanklar, zirehli texnika və digər silahlarla təmin edilib. Lakin planın ən zəif tərəfi siyasi hesablamalar olub. ABŞ rəhbərliyi kubalıların böyük hissəsinin Kastroya qarşı qalxacağına inanıb, amma bu ehtimalı təsdiqləyən etibarlı əsaslar kifayət etməyib.

İlk zərbə və ifşa olunan plan

Əvvəlcə desantın Trinidad şəhəri yaxınlığında çıxarılması nəzərdə tutulub. Lakin yeni prezident Con Kennedi planı dəyişdirərək əməliyyatın bataqlıq ərazilərlə əhatələnmiş Donuzlar körfəzində həyata keçirilməsinə razılıq verib. Bu qərar hücum edənlərin manevr imkanlarını məhdudlaşdırıb.

Aprelin 15-də ABŞ-nin dəstəklədiyi səkkiz B-26 bombardmançı təyyarəsi Kuba aerodromlarına zərbə endirib. Məqsəd ölkənin hərbi aviasiyasını sıradan çıxarmaq olub. Ancaq hücum gözlənilən nəticəni verməyib: Kuba təyyarələrinin yalnız bir neçəsi məhv edilib. Əməliyyatın arxasında ABŞ-nin dayandığını gizlətmək üçün təyyarələrdən birinin guya Kubadan qaçan pilot tərəfindən idarə olunduğu barədə versiya irəli sürülüb. Lakin bu ssenari Mayamidə ifşa olunub. Kennedi növbəti hava hücumu dalğasını ləğv edib və bununla da desant qüvvələrinin hava dəstəyini zəiflədib.

Aprelin 17-də mühacirlər üç istiqamətdən sahilə çıxmağa başlayıblar. Lakin Kuba aviasiyası dərhal əks-hücuma keçib. Hücum edənlərin təchizatını daşıyan “Houston” və “Rio Escondido” gəmiləri vurularaq sıradan çıxarılıb. Nəticədə silah-sursat və digər ləvazimatların döyüş meydanına çatdırılması çətinləşib.
Fidel Kastro vəziyyəti şəxsən nəzarətdə saxlayaraq əks-hücum əmri verib. Kuba ordusu desant qüvvələrini sahildə sıxışdırmağa başlayıb. Döyüşlərin gedişinə təsir edən amillərdən biri də sovet istehsalı T-34-85 tanklarının istifadəsi olub. Xüsusilə Playa Xiron istiqamətindəki döyüşlərdə Kuba qüvvələri hücum edənlərin irəliləməsini dayandırıb.

ABŞ əməliyyatın birbaşa iştirakçısı olmadığını göstərməyə çalışsa da, hadisələrdə amerikalı hərbçilərin də rolu üzə çıxıb. Alabama milli qvardiyasının pilotları da döyüşlərə cəlb edilib. İki B-26 təyyarəsi vurulub, amerikalı pilot Tomas Pit Rey həlak olub. ABŞ-ın hərbi gəmiləri isə vəziyyətin daha da ağırlaşması fonunda geri çəkilib. Aprelin 19-na qədər desant qüvvələrinin müqaviməti əsasən qırılıb. 2506-cı briqadanın 114 üzvü öldürülüb, 1 202 nəfəri əsir götürülüb. Kuba tərəfinin itkiləri isə 176 nəfər həlak olan və təxminən 500 yaralanan təşkil edib.

Uğursuzluğun nəticələri

Donuzlar körfəzi əməliyyatı ABŞ-nin xarici siyasətində ciddi uğursuzluq kimi tarixə düşüb. MKİ rəhbərliyinin planlaşdırma və kəşfiyyat səhvləri tənqid olunub, Allen Dalles isə sonradan vəzifəsindən uzaqlaşdırılıb. Əməliyyatın iflasa uğraması ABŞ-nin Kubada kütləvi xalq üsyanı yaranacağına dair hesablamalarının yanlış olduğunu üzə çıxarıb.

Lakin məğlubiyyət Kastronun mövqelərini zəiflətmək əvəzinə, onun hakimiyyətini gücləndirib. Kuba rəhbərliyi hadisələri ölkəyə qarşı xarici müdaxilə kimi təqdim edib, inqilabın sosialist xarakterini daha açıq şəkildə elan edib və Sovet İttifaqı ilə əlaqələrini dərinləşdirib. Əsir götürülmüş briqada üzvlərinin böyük hissəsi 1962-ci ilin dekabrında ABŞ-la aparılan razılaşma çərçivəsində ərzaq və tibbi ləvazimatlar müqabilində azad edilib. Kuba isə ABŞ-dən 53 milyon dollar dəyərində kompensasiya tələb edib.
Donuzlar körfəzi əməliyyatı göstərib ki, xaricdə hazırlanmış silahlı qüvvələrin hücumu ölkə daxilində avtomatik olaraq xalq üsyanı yaratmır. Vaşinqton Kastronu devirmək istəyib, lakin nəticədə onun hakimiyyətini möhkəmləndirib və Kubanı Moskva ilə daha sıx əməkdaşlığa yönəldib. Beləliklə, cəmi 72 saat davam edən döyüşlər “soyuq müharibə” tarixində dərin iz buraxıb və ABŞ-ın gizli əməliyyatlarının planlaşdırılmasındakı ciddi səhvləri üzə çıxarıb.

İlkin Nəcəf

The post Donuzlar körfəzində 72 saat – ABŞ-nin Kubada uğursuz əməliyyatı appeared first on PARAQRAF.

Paraqraf.com xəbər verir ki, Agentliyin sədri Ülvi Mehdiyev qonağı Prezident İlham Əliyevin təşəbbüsü əsasında yaradılmış “ASAN xidmət” mərkəzləri və innovasiyalar sahəsində həyata keçirilən layihələr barədə ətraflı məlumatlandırıb.

Qonağa “ASAN xidmət” modelinin intellektual məhsul kimi ixracı istiqamətində 50-dən çox ölkə ilə əməkdaşlıq edildiyi diqqətə çatdırılıb.

İ.O.Şeyx Əhməd dövlət xidmətlərinin vətəndaşlara daha əlçatan, çevik və innovativ formada təqdim olunmasında “ASAN xidmət” modelinin əhəmiyyətini vurğulayaraq, bu qabaqcıl təcrübənin İƏT-ə üzv ölkələrdə də tətbiqinin dövlət xidmətlərinin keyfiyyətinin yüksəldilməsinə və vətəndaş məmnunluğunun artırılmasına mühüm töhfə verə biləcəyini qeyd edib.

Qonaq həmçinin “INNOLAND” İnkubasiya və Akselerasiya Mərkəzinin, Səyyar ASAN xidmətin və “ABAD” publik hüquqi şəxsin fəaliyyəti ilə tanış olub.

Paraqraf.com 

The post İslam Əməkdaşlıq Təşkilatının baş katibi “ASAN xidmət” mərkəzi ilə tanış olub appeared first on PARAQRAF.

Bu barədə Paraqraf.com-a Fövqəladə Hallar Nazirliyindən məlumat verilib.

Bildirilib ki, Dövlət Yanğın Nəzarəti Xidməti əməkdaşları Yasamal rayonu, Akademik Şəfaət Mehdiyev küçəsi, ev 23 ünvanında fəaliyyət göstərən “El Pizza” restoranında yoxlama zamanı yanğın təhlükəsizliyi sahəsində bir sıra nöqsanlar aşkar ediblər.

Yanğın təhlükəsizliyi norma və qaydalarının tələblərinin kobud pozulması faktları aşkar edilmiş Bakı şəhəri, Yasamal rayonu, Akademik Şəfaət Mehdiyev küçəsi, ev 23 ünvanında fəaliyyət göstərən “El Pizza” restoranının fəaliyyətinin dayandırılması barədə Qərar qəbul olunub və Qərarın bir nüsxəsi obyektin nümayəndəsinə təqdim edilib.

Paraqraf.com 

The post Bakıda yanğın təhlükəsizliyi qaydalarını pozan restoranın fəaliyyəti dayandırılıb appeared first on PARAQRAF.

Bu barədə Paraqraf.com-a Milli Hidrometeorologiya Xidmətindən məlumat verilib.

Bildirilib ki, Bakıda və Abşeron yarımadasında hava şəraitinin dəyişkən buludlu olacağı, arabir tutulacağı, əsasən yağmursuz keçəcəyi gözlənilir. Şimal-qərb küləyi gündüz şimal-şərq küləyi ilə əvəz olunacaq.

Havanın temperaturu gecə 12-15° isti, gündüz 17-21° isti olacaq. Atmosfer təzyiqi 766 mm civə sütunu təşkil edəcək. Nisbi rütubət gecə 70-80 %, gündüz 50-55 % olacaq.

Azərbaycanın rayonlarında hava şəraiti əsasən yağmursuz olacaq. Lakin gündüz bəzi yerlərdə çiskinli yağış yağacağı ehtimalı var. Bəzi yerlərdə arabir duman olacaq. Şərq küləyi əsəcək.

Havanın temperaturu gecə 11-14° isti, gündüz 17-20° isti, dağlarda gecə 0-5° isti, gündüz 5-10° isti olacaq.

Paraqraf.com 

The post Bakıda sabah 21 dərəcə isti olacaq appeared first on PARAQRAF.

Bu barədə Paraqraf.com-a Bakı Şəhər İcra Hakimiyyətindən məlumatı verilib.

Bildirilib ki, Bakı şəhərinin Nəsimi rayonunda, 28 May küçəsində yeni parkın salınması üçün görülən işlərin icrası zamanı Yaşıllaşdırma Təsərrüfatı Birliyinin əməkdaşları tərəfindən bir ağacın kəsilərkən aqrotexniki qaydalara riayət olunmaması faktı aşkar edilib.

“Həmin ağacın gövdəsinin içəridən çürümüş vəziyyətdə olmasına baxmayaraq, bu hal onun kəsilməsi zamanı müvafiq qaydalara əməl edilməsi tələbini aradan qaldırmır. Ağacın qəzalı vəziyyətdə olması və ya gövdəsinin çürüməsi belə onun götürülməsi prosesinin müəyyən edilmiş aqrotexniki tələblərə uyğun həyata keçirilməsini zəruri edir. Aşkar edilmiş nöqsanla bağlı dərhal müvafiq inzibati tənbeh tədbiri görülüb. Həmçinin işində yol verdiyi nöqsanlara görə Birliyin əməkdaşı tutduğu vəzifədən azad edilib”.

Məlumatda eyni zamanda vurğulanıb ki, sözügedən ərazidə təxminən 10 hektar sahədə park salınacaq:

“Əraziyə ilkin baxış zamanı qəzalı vəziyyətdə olan ağaclar müəyyən edilib. Söhbət əsasən ötən əsrin 80-ci illərində Bakıda kütləvi şəkildə əkilmiş qovaq ağaclarından gedir. Bu ağacların kök sisteminin zəif olması onların aşma riskini artırır və ətraf mühit, eləcə də insanların təhlükəsizliyi baxımından müəyyən risklər yaradır. Bu baxımdan qəzalı ağacların götürülməsi, gələcəkdə parkın salınması, yeraltı avtomobil dayanacağının tikintisi və xeyli sayda yeni ağacın əkilməsi planlaşdırılır”.

Paraqraf.com 

The post Bakıda ağacları kəsərkən qayda pozuntusuna yol verən əməkdaş işdən çıxarılıb appeared first on PARAQRAF.

Paraqraf.com xəbər verir ki, bu barədə Azərbaycan Elm və Təhsil Nazirliyinin (ETN) açıqlamasında qeyd olunub.

Qeyd olunub ki, bu, tamamilə yersiz açıqlama olaraq Azərbaycanın daxili işlərinə müdaxilə cəhdindən başqa bir şey deyildir:

“Heç kimə ölkəmizin daxili işlərinə, o cümlədən təhsil siyasətinə müdaxilə etməyə icazə verilmir və bu kimi müdaxilə cəhdlərinin qarşısı qətiyyətlə alınır. İran rəsmilərinə tövsiyə edərdik ki, başqa ölkələrin daxili işlərinə müdaxilə etmək əvəzinə öz ölkələrinin problemləri ilə məşğul olsunlar”.

Həmçinin açıqlamada bildirilib ki, İranın həyata keçirdiyi siyasət nəticəsində bu ölkədə Azərbaycan dilində tədris aparılan bir məktəb belə yoxdur:

“Ali təhsil müəssisələrində də Azərbaycan dilində tədris həyata keçirilmir. Halbuki İran əhalisinin təxminən 40 milyonunu köklü etnik azərbaycanlılar təşkil edir və onlar onilliklərdir öz ana dillərində təhsil almaq hüququndan məhrum edilirlər. İranın elm, tədqiqat və texnologiya naziri və bu mövzuda İranda çıxış edən digər şəxslər yaxşı olardı ki, Azərbaycanın daxili işlərinə müdaxilə etmək əvəzinə məhz bu məsələlərlə məşğul olsunlar və onilliklərdir davam edən bu misli görünməmiş ədalətsizliyin aradan qaldırılması üçün tədbirlər görsünlər”.

Paraqraf.com 

The post Elm və Təhsil Nazirliyi: İranlı nazirin açıqlaması Azərbaycanın daxili işlərinə müdaxilə cəhdidir appeared first on PARAQRAF.

Paraqraf.com xəbər verir ki, Təqdimat Qırğızıstanın paytaxtı Bişkekdə, Yusuf Balasaqun adına Qırğız Milli Universitetində Türk Dünyası Jurnalistlər Federasiyası tərəfindən keçirilən Türk Dünyası Qırğızıstan Jurnalistlər Çalıştayı çərçivəsində baş tutub.

Qırğızıstan Jurnalistlər Birliyinin sədri İlyasbek Baltaşev tərəfindən Aqil Ələsgərə birliyin fəxri üzvlük vəsiqəsi, həmçinin “Ən yaxşı jurnalist” medalı təqdim edilib.

İlyasbek Baltaşev qeyd edib ki, Qırğızıstan Jurnalistlər Birliyi 20 ildən çoxdur ki, fəaliyyət göstərir:

“İlk dəfədir ki, biz ölkə xaricindən jurnalistləri təltif edirik. Bu təltif türk xalqları arasında dostluq və qardaşlıq münasibətlərinin media müstəvisində gücləndirilməsi, ortaq dəyərlərin təbliği və jurnalistlər arasında peşəkar əməkdaşlığın genişləndirilməsi istiqamətində fəaliyyətinə verilən qiymətdir”.

Paraqraf.com 

The post Azərbaycanlı jurnalist Qırğızıstan Jurnalistlər Birliyinin fəxri üzvü seçilib appeared first on PARAQRAF.

Bu barədə Paraqraf.com-a Daxili İşlər Nazirliyi və Baş Prokurorluqdan birgə məlumat daxil olub.

Bildirilib ki, oktyabrın 23-də saat 00:10 radələrində paytaxtın Xətai rayonu, General Şıxlinski küçəsində yerləşən restoranlardan birində 43 yaşlı C.Mirağayevin bıçaq xəsarətlərindən qətlə yetirilməsi ilə nəticələnən hadisə baş verib.

Baş Prokurorluğun və Daxili İşlər Nazirliyinin istintaq qrupu tərəfindən keçirilən əməliyyat-axtarış tədbirləri nəticəsində hadisənin planlı şəkildə təşkilində iştirak etdikləri müəyyən olunan, əvvəllər məhkum olunmuş Ramil Dadaşov, Eldar Eldarov, Əhməd Əlizadə, İsmayıl Kazımov, Həsən Zülfüqarov, Fərid Əyyublu və Xəyyam Səfixanov, eləcə də Mikayıl İsmayılov, Kamran Əfəndiyev, Elvin Səfərov və Elmar Nuriyev həbs ediliblər.

Qeyd olunan şəxslərin cinayətkar aləmin qaydalarına uyğun həyat tərzi keçirməklə, mütəmadi qanunsuz fəaliyyətlə məşğul olduqları, kriminal araşdırmalar aparmaqla hədə-qorxu ilə pul tələb edilməsi, cinayətkar dairələrdə nüfuz qazanmaq və tələblərinə tabe olmayan şəxsləri sərt cəzalandırmaq üçün odlu, həmçinin soyuq silahlardan istifadə etməklə qəsdən sağlamlığa ağır zərər vurulması məqsədilə cinayətkar birlik yaratdıqları, eləcə də onun fəaliyyətində iştirak etdikləri müəyyən olunub.

Faktla bağlı Cinayət Məcəlləsinin müvafiq maddələri ilə başlanmış cinayət işi üzrə bütün halların, saxlanılanların hər birinin cinayətdə iştirakının, cinayətkar birliyin fəaliyyət istiqamətləri və əlaqələrinin müəyyən edilməsi məqsədilə zəruri əməliyyat-istintaq tədbirləri davam etdirilir.

Qeyd edək ki, həbs edilənlərdən Əhməd Əlizadə Milli Məclisinin deputatı Arzuxan Əlizadənin oğludur.

Paraqraf.com 

The post Xətai rayonunda cinayətkar birliyin fəaliyyəti ilə bağlı 11 nəfər saxlanılaraq həbs edilib appeared first on PARAQRAF.

Paraqraf.com xəbər verir ki, bunu hərracların məlumatları təsdiqləyib.

Londonun “ICE Futures” birjasında “Brent” markalı neftin dekabr fyuçersləri 1 barel üçün 114,53 ABŞ dolları təşkil edib ki, bu da əvvəlki hərracların bağlanış səviyyəsindən 2,19 ABŞ dolları (1,88 %) azdır.

Nyu-York Əmtəə Birjasının (NYMEX) elektron hərraclarında WTI markalı neftin dekabr fyuçersləri 2,21 ABŞ dolları (2,14 %) ucuzlaşaraq 1 barel üçün 101,06 ABŞ dolları təşkil edib.

Paraqraf.com 

The post “Brent” markalı neft 2 %-dən çox ucuzlaşıb appeared first on PARAQRAF.

Paraqraf.com-un Dövlət Gömrük Komitəsinə istinadən verdiyi xəbərə görə, bu miqdarda məhsulun dəyəri 644 milyon 318,31 min ABŞ dolları təşkil edib.

İxrac olunmuş məhsulun miqdarı 2025-ci ilin 9 ayı ilə müqayisədə 30,23 %, dəyəri isə 50,07 % çoxdur.

Rumıniyaya ixrac edilən xam neftin Azərbaycanın ümumi neft ixracında payı 6,4 % olub.

Qeyd edək ki, bu ilin yanvar-sentyabr aylarında gömrük bəyannamələrinə əsasən, Azərbaycan dəyəri 10 milyard 103 milyon 482,51 min ABŞ dolları olan 15 milyon 829 min 589,9 ton həcmində bitumlu süxurlardan alınmış xam neft və neft məhsulları ixrac edib.

Hesabat dövründə Azərbaycan xarici ölkələrlə 37 milyard 211 milyon ABŞ dolları dəyərində ticarət əməliyyatı aparıb. Xarici ticarət dövriyyəsinin 23 milyard 865 milyon ABŞ dolları ixracın, 13 milyard 346 milyon ABŞ dolları isə idxalın payına düşüb.

Paraqraf.com 

The post Azərbaycan Rumıniyaya neft satışını 30 %-dən çox artırıb appeared first on PARAQRAF.

Paraqraf.com Azərbaycan Mərkəzi Bankına (AMB) istinadən xəbər verir ki, bu, 2025-ci ilin eyni dövrü ilə müqayisədə 12,6 % çoxdur.

Hesabat dövründə könüllü sığorta növləri üzrə ödənişlərin məbləği 756,936 milyon manat təşkil edib ki, bu da 1 il əvvələ nisbətən 30,9 % çoxdur.

Beləliklə, 9 ayda könüllü sığorta bazarından toplanmış hər 100 manat sığorta haqqının 76,2 manatı qədər ödəniş edilib. Bu rəqəm 1 il bundan əvvəl 65,6 manat olub.

Xatırladaq ki, bu ilin yanvar-sentyabr aylarında Azərbaycandakı 16 sığorta şirkətinin xətti ilə 1 milyard 248,485 milyon manat sığorta haqqı toplanılıb. Bu, ötən ilin eyni dövrünə nisbətən 7,9 % çoxdur.

Hesabat dövründə sığorta şirkətlərinin həyata keçirdikləri ödənişlərin məbləği isə 882,723 milyon manat təşkil edib. Bu isə illik müqayisədə 29,1 % çoxdur. 9 ay ərzində sığorta bazarında toplanmış hər 100 manat sığorta haqqının 70,7 manatı ödəniş edilib. Ötən ilin eyni dövründə bu göstərici 59,1 manat olub.

Paraqraf.com 

The post Azərbaycanda könüllü sığorta bazarı 13 %-ə yaxın böyüyüb appeared first on PARAQRAF.

Paraqraf.com-un Dövlət Statistika Komitəsinin məlumatları əsasında apardığı hesablamalarına əsasən, bu, 2025-ci ilin eyni dövrünün göstəricisindən dəyər ifadəsində 19,5 % çox, kəmiyyət olaraq – 22 % azdır.

Hesabat dövründə Azərbaycan Rusiyaya 46,79 milyon ABŞ dolları dəyərində (1 il əvvəlki göstəricidən 25 % çox) 5 min 115 ton (-12 %), İtaliyaya 27,67 milyon ABŞ dolları dəyərində (+2,7 dəfə) 2 min ton (+65 %), Almaniyaya 17,15 milyon ABŞ dolları dəyərində (+4,5 %) 1 min 143 ton (-42 %), İsveçrəyə 4,73 milyon ABŞ dolları dəyərində (-4,3 %) 320 ton (-43 %), Suriyaya 2,65 milyon ABŞ dolları dəyərində 274 ton (1 il əvvəl tədarük olmayıb) məhsul satıb.

Azərbaycan 9 il 10 aylıq fasilənin ardından Avstriyaya tədarükü (24,6 min ABŞ dolları dəyərində 2,33 ton) bərpa edib.

Paraqraf.com 

The post Azərbaycan Avstriyaya fındıq ixracını bərpa edib appeared first on PARAQRAF.

Paraqraf.com Dövlət Gömrük Komitəsinə istinadən xəbər verir ki, bu miqdarda məhsulun dəyəri 5 milyard 511 milyon 082,12 min ABŞ dolları təşkil edib.

İxrac olunmuş məhsulun miqdarı 2025-ci ilin 9 ayı ilə müqayisədə 7,4 % az, dəyəri isə 10,4 % çoxdur.

İtaliyaya ixrac edilən xam neftin Azərbaycanın ümumi neft ixracında payı 56,1 % olub.

Qeyd edək ki, bu ilin yanvar-sentyabr aylarında gömrük bəyannamələrinə əsasən, Azərbaycan dəyəri 10 milyard 103 milyon 482,51 min ABŞ dolları olan 15 milyon 829 min 589,9 ton həcmində bitumlu süxurlardan alınmış xam neft və neft məhsulları ixrac edib.

Hesabat dövründə Azərbaycan xarici ölkələrlə 37 milyard 211 milyon ABŞ dolları dəyərində ticarət əməliyyatı aparıb. Xarici ticarət dövriyyəsinin 23 milyard 865 milyon ABŞ dolları ixracın, 13 milyard 346 milyon ABŞ dolları isə idxalın payına düşüb.

Paraqraf.com 

The post Azərbaycan İtaliyaya neft satışından qazancını 10 %-dən çox artırıb appeared first on PARAQRAF.